Ու՞մ «շնորհիվ» է վատթարացել հպարտ քաղաքացիների կյանքը

Հեղափոխական պաշտոնյաները եկան փոխարինելու «նախկին թալանչիներին» մեկ գլխավոր խոստումով՝ ավելի բարեկեցիկ դարձնել քաղաքացիների կյանքը և թեթևացնել այն հարվածները, որոնք նախկինների կողմից հասցվում էին այդ նույն քաղաքացիների գրպանին:

Հեղափոխությունից հինգ տարի անց մենք կարող ենք արձանագրել, որ հեղափոխական պաշտոնյաների մոտ այդ խոստումը պահելը, մեղմ ասած, չի ստացվել: Նրանցից շատերը հակառակը՝ արել են ամեն բան, որպեսզի հպարտ քաղաքացիների կյանքը էլ ավելի թանկանա և դժվարանա:

Դիցուք՝  Փաշինյանի թիմակից, էկոնոմիկայի նախարար Վահան Քերոբյանը փաստացի «յուղոտ խաչ» է քաշում Փաշինյանի գյուղատնտեսական հեղափոխության տեսլականի ու խոստումների վրա` բացահայտ ակնարկելով, որ գյուղատնտեսության հետ առանձնապես հույսեր կապել պետք չէ, և տնտեսության մեջ գյուղատնտեսության տեսակարար կշիռը գնալով նվազելու է: Օրեր առաջ էլ Քերոբյանը հայտարարեց, որ այս գարնանացանին սերմացուն պետությունը չի սուբսիդավորելու: Այստեղ նույնպես էկոնոմիկայի նախարարը քաշեց գյուղացիներին:

Առողջապահության նախարար Անահիտ Ավանեսյանի որոշմամբ պետական այն ծառայողներին, ովքեր չէին համաձայնվում պատվաստվել, պարտադրվում էին ամիսը երկու անգամ սեփական գրպանի հաշվին թեստ անել: Այսինքն՝ պետական ծառայողները, որոնց աշխատավարձը չի բարձրացել, ստիպված էին կամ պատվաստվել, կամ ամսեկան 30 հազար դրամ ծախսել թեստավորման վրա: Սա առողջապահության նախարարության միակ նվերը չէր քաղաքացիներին, որ արձանագրվել է հեղափոխությունից հետո: 2020 թվականի հունվարից առաջնային բուժսպասարկման հաստատություններում ներդրվել են նոր ծառայություններ, որոնք քաղաքացիներին ավելորդ թղթաբանություններից զերծ պահելու համար են, բայց այս փոփոխությանը զուգահեռ, առողջապահության նախարարությունը կասեցրել է պոլիկլինիկաներում մինչ այս անվճար մատուցվող որոշ բուժծառայությունների ֆինանսավորումը: Ի դեպ, խնդիրն առկա է ոչ միայն Երևանում։ Գյումրու «Միջազգային Կարմիր Խաչի անվան պոլիկլինիկա»-ում մի քանի տարի շարունակ գործել է ուրոլոգիական անվճար ծառայություն։ Այն ներառված է եղել, այսպես կոչված, «այլ կաբինետային» ծառայության համակարգում, որի համար պետպատվերի շրջանակներում ֆինանսավորում են ստացել ու անվճար հետազոտվել են հատուկ սոցիալական խմբերում ներառված քաղաքացիները։ Բայց 2020 թ-ի հունվարի 1-ից այն վճարովի է պոլիկլինիկայի բոլոր պացիենտների համար։

Սահմանային շերտում լուսանկարահանումներ իրականացնելու համար «Իմ քայլի» պատգամավոր Արմեն Խաչատրյանի առաջարկով սահմանվել է շուրջ 300 հազար դրամի տուգանք:

Հետ չի մնացել Երևանի քաղաքապետարանը՝ հարվածելով քաղաքացիների գրպանին:  Սվագանու «Իմ քայլը» խմբակցությունը, ի թիվս այլ հարկերի եւ տուրքերի, բարձրացրեց նաեւ աղբահանության համար գանձվող վճարը: Արդեն նախկին քաղաքապպետ Հրաչյա Սարգսյանը որոշել էր պատժել նաև աղբը չթույլատրված վայրում նետողներին՝ 300 հազար դրամով:

ԱԺ կողմից ընդունված բալային համակարգի մասին օրենքը նույնպես լրացուցիչ բեռ դարձավ վարորդների համար:

Շրջակա միջավայրի նախարարությունը, որը այդ պահին ղեկավարում էր Ռոմանոս Պետրոսյանը, շրջանառության մեջ դրեց օրենքի նախագիծ, որով առաջարկում էր տուգանել այն վարորդներին, ովքեր իրենց տրանսպորտային միջոցը կշահագործեն առանց կատալիտիկ չեզոքացուցիչների՝ կատալիզատորների։

Դիլիջանի համայնքապետ ընտրվելուց հետո ՀՀԿ-ական նախկին պատգամավորի որդին՝ Վահագն Արսենյանը, ըստ որոշ տեղեկությունների, կտրուկ ՝ շուրջ 40 անգամ բարձրացրել է անշարժ գույքի համար վճարվող հարկը:

ԱԺ թեթև ձեռամբ թանկացավ նաև գույքահարկը` դոմինոյի էֆեկտով թանկացումներ առաջացնելով նաև մյուս ոլորտներում: Նախագծի հեղինակները «Իմ քայլը» խմբակցության պատգամավորներ Գևորգ Պապոյանն ու Արգիշտի Մեխակյանն էին:

Ֆինանսների նախարարության թեթև ձեռքով էլ Հայաստանում թե՛ ցածր, թե՛ բարձր աշխատավարձ ստացողները վճարելու են համահարթ՝ 23 տոկոս եկամտահարկ:

ՔՊ-ական պատգամավոր Արթուր Հովհաննիսյանի թեթև ձեռամբ օրենքի ուժ ստացավ ԶԼՄ-ին՝ ոչ նույնականացված աղբյուրներին հղելու համար տուգանելու նախագիծը:

Ինչպես տեսնում ենք՝ իշխանությունները քաղաքացիների սոցիալ-տնտեսական վիճակը բարելավելու, նրանց հարկային բեռը թեթևացնելու փոխարեն գնում են այլ ճանապարհով՝ վերջիններիս դիտարկելով իբրև իսկական տուգանքի մատերիալ...