Թիմակիցներից ո՞ւմ առաջինը «կզոհաբերի» Նիկոլ Փաշինյանը

Հաշվեքննիչ պալատը հանրայնացրել է Առողջապահության նախարարության 2022 թվականի պետական բյուջեի տարեկան մուտքերի ձևավորման և ելքերի իրականացման մասին եզրակացությունը: Հաշվեքննությունն ընդգրկող ժամանակաշրջանը 2022 թվականի հունվարի 1-ից 2022 թվականի դեկտեմբերի 31-ն է, կատարման ժամկետը՝ 2023 թվականի հունվարի 9-ից 2023 թվականի ապրիլի 30-ը ներառյալ:

Եզրակացությամբ արձանագրվել է, որ 2022 թ.-ին, բացի տարեկան պետական բյուջեի ԱՆ համար նախատեսված շուրջ 117 միլիարդ 808 միլիոն 508 հազար դրամ գումարը, կորոնավիրուսային վարակի կանխարգելման, վերահսկման, բուժման և այլ համալիր միջոցառումների իրականացման շրջանակներում նախարարության ներկայացմամբ կառավարության 5 որոշումներով նախարարությանը հատկացվել է ևս 10 միլիարդ 466 միլիոն 626 հազար դրամ: Հաշվեքննությունից պարզ է դառնում, որ չնայած այն հանգամանքին, որ բժշկական ծառայությունների գների հաշվարկման մեթոդաբանությունը հաստատվել է դեռ 2019 թվականին, սակայն առ հաշվեքննության ավարտի օրն այն չի կիրառվում, նախարարությունը չի ապահովել նաև կառավարության 2004 թվականի մարտի 4-ի N 318 Ն որոշմամբ սահմանված բժշկական օգնության և սպասարկման գների հաստատման կարգի պահանջների կատարումը, ինչի հետևանքով բացակայում են ոլորտում ծառայությունների համար կիրառվող գների իրավամեթոդաբանական հիմնավորումները

Մեկ այլ անհամապատասխանության մասին ևս. պատվաստումների վերաբերյալ տվյալների (ըստ պատվաստվողների թվի, պատվաստման ժամանակահատվածի, պատվաստման փուլերի, պատվաստումն իրականացրած բուժհաստատության անվանման, պատվաստանյութի տեսակի) բացակայության պատճառով հնարավոր չի եղել ուսումնասիրել տվյալ միջոցառման շրջանակներում հատկացված միջոցների ծախսման ճշտությունը, քանի որ պատվաստումներ իրականացրած բուժանձնակազմի լրավճարի համար կատարված ծախսերը, համաձայն նախարարության կողմից տրված պարզաբանման, հնարավոր չէ արտահանել էլեկտրոնային առողջապահության համակարգից::

Հիշեցնենք, որ մինչ այս էլ Հաշվեքննիչ Պալատը խախտումներ էր արձանագրել առողջապահության նախարարությունում, որոնք վերաբերվում էին արդեն նախկին նախարար Արսեն Թորոսյանի ղեկավարման շրջանին: Ստացվում է, որ թե նախկին, թե գործող նախարարները թիրախի տակ են և նրանց գլխին, մեղմ ասած, մութ ամպեր են կուտակվում: Վերջին շաբաթներին, կարծես թե, մարել է աղմուկը՝ կապված Արսեն Թորոսյանի անվան հետ․ հիշեցնենք, որ վերջինիս նշանակած կադրերը մեկը մյուսի հետևից կալանավորվեցին՝ քովիդի շրջանում կատարած չարաշահումների և յուրացումների մեղադրանքով: Այն բանից հետո, երբ Թորոսյանը հրապարակայնորեն, սակայն, տողատակով խոստացավ խոսել կոռուպցիոն հանցագործությունների մասին և դրանք ջրի երես հանել՝ վերջինիս, կարծես թե, մի պահ մոռացան:

Այժմ հերթը Անահիտ Ավանեսյանինն է և հարց է առաջանում՝ թիմակիցներից ո՞ւմ առաջինը «կզոհաբերի» Նիկոլ Փաշինյանը...