ՊԵԿ-ի «սերը» թանկ է նստել հարկ վճարողների վրա

Այն բանից հետո, ինչ ՊԵԿ-ը  ընդգծված ջանասիրությամբ շնորհավորեց հայաստանցի հարկ վճարողների օրը, թվում էր, թե կառույցը այդքանով էլ կսահմանափակվեր: Սակայն, ինչպես երևում է, հանրությունը և հատկապես հարկ վճարողները թերագնահատում են իրենց նշանակությունը ՊԵԿ-ի համար:

Պարզվում է, որ միայն sms շնորհավորանքներով չսահմանափակված ՊԵԿ-ը նաև 12 միլիոն դրամ է հատկացրել համերգ կազմակերպելու համար, որը, անշուշտ, նվիրված էր վերը նշված հարկ վճարողների օրվան: Ասել է թե՝ հարկ վճարողների վճարած հարկերը ուղղել են համերգին և այդ նույն հարկ վճարողներին շնարհավորելու:

Շուրջ 12 մլն դրամ արժեցած համերգը տեղի է ունեցել Արամ Խաչատրյան համերգասրահում՝ Հայաստանի պետական սիմֆոնիկ նվագախմբի մասնակցությամբ՝ դիրիժոր Սերգեյ Սմբատյանի գլխավորությամբ։ Հարկատուների համար կազմակերպված համերգը տևել է 90 րոպե, ներկա է եղել 1280 հյուր։ Հարկ վճարող ութ իրավաբանական անձ էլ արժանացել է անվանական հուշանվերի, որոնցից յուրաքանչյուրի արժեքը 25 հազար դրամ է։

Երբ ՊԵԿ-ը հայտարարում է, որ հարկ վճարողները չպետք է թաքցնեն հարկերը, քանի որ դրանք ուղղվում են պետության շենացմանը, հարկ վճարողները այդ շենացումը համերգին 12 միլիոն հատկացնելու միջոցով չեն տեսնում:

Արդյոք հնարավոր է գտնել ավելի վառ վկայություն այն բանի, որ պետական կառույցները վերջին տարիներին, մեղմ ասած, ոչ արդյունավետ են ծախսում հարկատուների՝ բյուջե վճարած գումարները...