Դիլիջանում «թավշյա ամենաթողությո՞ւն» է տիրում

Նախորդ ՏԻՄ ընտրությունների արդյունքում Դիլիջանի համայնքապետ ընտրված Դավիթ Սարգսյանը բուռն գործունեություն ծավալելու հետ մեկտեղ համայնքապետը հասցրել է  բավականին ոչ միանշանակ պատմության կիզակետում  հայտնվել: Մամուլը ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Մայիսի 5-ին Դիլիջան համայնքի ավագանին, միաձայն՝ 18 կողմով, որոշել է համաձայնություն տալ Դիլիջան համայնքի սեփականությունը հանդիսացող «Գյուղատնտնտեսական նշանակության հողերից» 48049.7քմ մակերեսով թվով 6 հողամասերը, «Բնակավայրերի հողերից» 1169.2քմ ընդհանուր մակերեսով թվով 4 հողամասերը աճուրդի միջոցով օտարելու մասին համայնքի ղեկավարի առաջարկությանը և հաստատել մեկնարկային գները։ Եվ կրկին աճուրդային վաճառքի ներկայցված մեկնարկային գները շուկայականից ցածր են։ Օրինակ՝ «Բնակավայրերի հողերից» Կալինինի փողոցում գտնվող հասարակական կառուցապատման համար նախատեսված 360 քմ հողամասի աճուրդ-վաճառքի մեկնարկային գին է սահմանված 2 միլիոն 520 հազար դրամը, Օրձոնիկիձեի փողոցի 376 քմ հողամասի մեկնարկային գին՝ 2 միլիոն 632 հազար դրամը եւ այլն։

Այսօր էլ տեղեկություն տարածվեց, որ քաղաքացի Տիգրան Դավթյանը հանցագործության մասին հաղորդում է ներկայացրել, թե Դիլիջանի ՔՊ խմբակցության ավագանու անդամ Նարեկ Հարությունյանը, ինչպես է ապօրինաբար ներխուժել իր հողատարածք եւ շինարարություն է իրականացնում: Ըստ քաղաքացու` ՔՊ ավագանու անդամ Նարեկ Հարությունյանը «տանիք» ունի, որոնք հովանավորում են իրեն: Ըստ ավագանու անդամի՝ գործը կոծկում են եւ Տավուշի մարզպետը եւ իրավապահները եւ Դիլիջան համայնքի ղեկավարը:

Այսքանից հետո հարց է առաջանում՝ էլ ի՞նչ պետք է անի Դիլիջանի համայքնապետը, որպեսզի պատկան մարմինները առնվազն ուսումնասիրություն սկսեն, պարզելու համար՝ վերը նշված մեղադրանքները իրականությանը համապատասխանում են, թե ոչ, կատարված քայլերը և ընդունված որոշումները օրենքի սահմաններում են, թե ոչ...