Ինչպես Փաշինյանը «ջարդեց» նարկոթրաֆիկի ողնաշարը Հայաստանում

Հեղափոխությունից հետո Նիկոլ Փաշինյանը հայտարարում էր, որ ինքն ու իր թիմը անզիջում պայքար են մղելու նարկոթրաֆիկի դեմ և կոտրելու են վերջինիս ողնաշարը: 

Վերջինս նույնիսկ ՄԱԿ էր մեկնել մասնակցելու թմրամոլության դեմ պայքարի նիստին:

Սակայն, հինգ տարի անց պետք է փաստենք, որ  Հայաստանում թմրամոլության ցուցանիշները վերջին տարիներին կտրուկ աճել են:

Եւ այսպես, պաշտոնական տեղեկության համաձայն՝ Հայաստանում թմրամիջոցների հետ կապված գրանցված հանցագործությունների թիվը 2016թ.-ին եղել է 1088, 2017թ.-ին՝ 1271 դեպք, 2018թ.-ին՝ 877 դեպք, 2019թ.-ին՝ 1088 դեպք, 2020թ.-ին՝ 1226 դեպք, 2021թ.-ին՝ 1544 դեպք, իսկ 2022թ.-ին՝ 2268 դեպք: Այսպիսով, կարող ենք արձանագրել, որ Նիկոլ Փաշինյանի հեղափոխական իշխանության օրոք թմրանյութերի օգտագործման առիթով գրանցված հանցագործությունների թիվը կտրուկ աճել է:

Հիշեցնենք՝ երեկ էլ պարզ դարձավ, որ Իտալիայի Ջոյա Տաուրո քաղաքի նավահանգստում ռեկորդային քանակի կոկաին են առգրավել (2.7 տոննա): Թմրանյութի փաթեթները թաքցված են եղել Էկվադորից ժամանած երկու բեռնարկղերում, որոնցով տեղափոխվում էր 78 տոննա բանան: Կոկաինը նախատեսված էր Վրաստանի Բաթումիի նավահանգստով Հայաստան ուղարկելու համար: ՊԵԿ-ը հայտարարել է, թե չգիտեն՝ ում անունով էր թմրանյութերով թաքնված բանանի բեռը Հայաստան մտնելու:

Ահա այսպես է Նիկոլ Փաշինյանը ջարդել նարկոթրաֆիկի ողնաշարը Հայաստանում...