Ինչ ունեցվածք ունեն բյուջեից փոխհատուցում ստացած «քյասիբ» պատգամավորները

«Քաղաքացիական պայմանագիր» խմբակցության որոշ պատգամավորների Երևանում վարձակալած բնակարանի վարձավճարը կփոխհատուցի Ազգային Ժողովը, այսինքն՝ պետբյուջեն: Մասնավորապես, բնակարանի վարձի փոխհատուցում ստանում են ՔՊ-ական պատգամավորներ Վահե Ղալումյանը, Թագուհի Ղազարյանը, Հովիկ Աղազարյանը, Մաթևոս Ասատրյանը, Արփի Դավոյանը, Կնյազ Հասանովը, Արեն Մկրտչյանը, Սերգեյ Մովսիսյանը, Լիլիթ Ստեփանյանը և Նարեկ Ղահրամանյանը, Արթուր Հովհաննիսյանը: Սա 2021 թվականի տվյալներով․ բանն այն է, որ ԱԺ լրատվության եւ հանրության հետ կապերի վարչությունը չի ցանկանում բացահայտել, թե վերջին 2 տարիներին ովքեր են դիմել պատգամավորներից վարձավճարի փոխհատուցման համար:  Հետևաբար, որպես հիմք կընդունենք 2021-ի տվյալները:

Այս ցանկից յուրաքանչյուր պատգամավոր որպես աշխատավարձ պետությունից ստանում է 661 հազար 400 դրամ, որպես գործուղումների ծախս՝ 250 000 դրամ, անցած ամսվա համար պետությունը նաև պարգևավճար է փոխանցել՝ 381 420 դրամ, և պարզվում է, բնակվարձի համար էլ փոխհատուցում է վճարվում՝ 100 000-ական ՀՀ դրամ: Ստացվում է, որ ամսական այս պատգամավորները ստացան՝ մոտ 1 միլիոն 400 հազար դրամ։

ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը դեռեւս 2021 թվականին պետությունից գումար է ստացել՝ որպես տան վարձավճարի փոխհատուցում. սա այն դեպքում, երբ նա, համաձայն իր պաշտոնական կենսագրության, ծնվել եւ ապրել է Երեւանում: Վերջինս 2021-ին հայտարարագրել է Նիսան մակնիշի ավտոմեքենա, բանկային հաշիվների մնացորդը կազմել է 600 հազար դրամ, կանխիկ դրամը՝ 200 հազար դրամ, հաշվետու տարվա եկամուտները՝ 6,664,690.00 դրամ:

Վահե Ղալումյանը չորս հողամաս է հայտարարագրել Տավուշի մարզում, բնակարան Երևանում որպես բաժնային սեփականություն և անհատական բնակելի տուն Իջևանում: Բացի այդ, վերջինս ունի 35,000,000.00 դրամի հանձնած և վերադարձրած փոխառություն, իսկ հաշվետու տարվա եկամուտները կազմել են 36,633,240.00 դրամ:

Հովիկ Աղազարյանն ունի սեփական հողատարածք Արարատի մարզում, իսկ դրամական միջոցները կազմում են 4,000,000 ՀՀ դրամ: 2021-ին նա ձեռք է բերել բնակարան Արաբկիրում: Հաշվետու տարվա եկամուտները կազմել են 8,026,040.00 դրամ:

Արփինե Դավոյանը հայտարարագրել է 2021-ին գնված Հյունդաի մակնիշի ավտոմեքենա, բանկային հաշիվների մնացորդը կազմել է 1,759,287.00 դրամ, հաշվետու տարվա եկամուտներն էլ 10,272,310.00 դրամ:

Արեն Մկրտչյանը հայտարարագրել է մարդատար ավտոմոբիլային տրանսպորտի միջոց MAZDA մակնիշի,  9,428,311.00 դրամի հանձնած և ստացված փոխառություն, բանկային հաշիվների մնացորդը կազմել է 349,635.00 դրամ, կանխիկ դրամը՝ 1,411,000.00, հաշվետու տարվա եկամուտները՝ 17,993,991.00 դրամ:

Ստացվում է, որ ժողովրդին ծառայելու համար իշխանության եկած պատգամավորներին, որոնցից շատերի դեպքում ԱԺ-ն առաջին աշխատատեղն էր, մոտավորապես 900 հազար դրամը ամսական չի բավարարում և նրանք որոշել են մտնել նաև հարկատուների գրպանը: Իհարկե չենք կարող պնդել, որ այս պատգամավորները այսօր էլ են ստանում նման փոխհատուցում, քանի որ ԱԺ-ն գաղտնի է պահում այդ պատգամավորների անունները, սակայն, ժամանակին ստացել են՝ ունենալով նման եկամուտներ: Թե որքանով է դա տեղավորվում գոտիները ամուր ձգելու Փաշինյանի թեզի մեջ՝ դատեք ինքներդ...