Զելենսկին մեկնել է Ճապոնիա

Ուկրաինայի նախագահ Վոլոդիմիր Զելենսկին անձամբ կմեկնի Հիրոսիմա (Ճապոնիա)՝ մասնակցելու G7 երկրների ղեկավարների (Գերմանիա, Մեծ Բրիտանիա, ԱՄՆ, Կանադա, Ֆրանսիա, Իտալիա և Ճապոնիա) գագաթնաժողովին։ Այս մասին հայտնում է Bloomberg-ը։

Մասնավորապես, Զելենսկին Սաուդյան Արաբիայում սպասվող կանգառից հետո ԱՄՆ ռազմական ինքնաթիռով կմեկնի Ճապոնիա, որտեղ կմասնակցի Արաբական լիգայի գագաթնաժողովին։

Միաժամանակ, ԱՄՆ Ազգային պաշտպանության խորհրդի ներկայացուցիչը հրաժարվել է մեկնաբանել այս տեղեկությունը։

Իր հերթին, Ուկրաինայի ազգային անվտանգության և պաշտպանության խորհրդի քարտուղար Ալեքսի Դանիլովն այսօր տեղեկատվական մարաթոնի եթերում հաստատել է, որ Զելենսկին ֆիզիկապես ներկա է լինելու G7-ի գագաթնաժողովին։ «Ո՞վ էր կասկածում, որ մեր նախագահը ներկա չի լինի այնտեղ, մենք համոզված էինք, որ մեր նախագահը անպայման կգտնվի այնտեղ, որտեղ պետք է, աշխարհի ցանկացած կետում, որպեսզի լուծի մեր երկրի կայունության հարցերը»,- ասել է Դանիլովը։

Ազգային անվտանգության և պաշտպանության խորհրդի քարտուղարը նշել է, որ գագաթնաժողովում կքննարկվեն կարևոր հարցեր։ «Մեր նախագահի ֆիզիկական ներկայությունն է բացարձակապես կարևոր, որպեսզի պաշտպանենք մեր շահերը, բացատրենք, հստակ առաջարկություններ և հստակ փաստարկներ ներկայացնենք մեր երկրի տարածքում տեղի ունեցող իրադարձությունների համար»,- ընդգծել է Դանիլովը։

Նա ասել է, որ օվկիանոսից այն կողմ մարդիկ միշտ չէ, որ զգում են, թե ինչ է կատարվում Ուկրաինայի տարածքում։