Ռոմանոս Պետրոսյանի հարվածը Նիկոլ Փաշինյանի «բրենդին»

ՀՀ պետական վերահսկողական ծառայության (ՊՎԾ) ղեկավարի հանձնարարագրով «Հայփոստ» ՓԲԸ-ում իրականացված ուսումնասիրությունների արդյունքների հիման վրա արձանագրվել են շուրջ 4,1 մլրդ դրամի խախտումներ։

Ինչպես տեղեկացնում են ՀՀ պետական վերահսկողական ծառայությունից, ուսումնասիրվել են 2017-2021 թվականների ընթացքում «Հայփոստ» ՓԲԸ-ի կառավարման արդյունավետության հետ կապված հարցեր, որոնց թվում եկամուտներն ու ծախսերը, դեբիտորական պարտքերը, գույքը, վարձակալությունները, ինչպես նաև իրականացված շինարարական աշխատանքները, գնումների գործընթացները և այլն:

«Հատկանշական է այն հանգամանքը, որ 2017-2019թթ.-ին ընկերությունն աշխատել է շահույթով, սակայն 2020-2021 թվականների գործունեության ամփոփ հաշվետվությունով արձանագրվել են ֆինանսական վնասներ:

Պարզվել է, որ «Հայփոստը» փոստային ծառայությունների մատուցման որակի բարձրացման նպատակով իռլանդական «Էսչեր Գրուպ» (Escher group) կազմակերպությունից շուրջ 1,7 մլն դոլարին համարժեք դրամով ձեռք է բերել «Riposte» ծրագրային համակարգ, սակայն համակարգը երբևէ չի գործածվել, չի ծառայել առաջնային նպատակներին: Փաստացի չօգտագործված ծրագրի ձեռքբերումը գնահատվել է որպես «Հայփոստի» ակտիվների ավելացում, ինչով պայմանավորված՝ շուրջ 446 մլն դրամ գումար՝ որպես ֆինանսական փոխհատուցում, վճարվել է ընկերության հավատարմագրային կառավարչին։

Համաձայն գնման պայմանագրի՝ ծրագիրը ոչ միայն չի շահագործվել, ինչպես նախատեսվել էր (նախատեսված էր օգտագործել 2016-2026թթ.-ին), այլև 2016-2021թթ.-ի համար շուրջ 410 մլն դրամ գումար ծախսագրվել է ծրագրի մաշվածության համար: Մասնավորապես՝ 2016թ.-ի համար ծախսագրվել է շուրջ 24,8 մլն դրամ, իսկ 2017-ի համար՝ շուրջ 75,8 մլն դրամ, 2018-2021թթ.-ին յուրաքանչյուր տարվա համար շուրջ 77,4 մլն դրամ:

Ուշագրավ է, որ ընդամենը երկու տարի առաջ ներկայացվեց Հայփոստի 2020-2025 թվականների զարգացման ռազմավարությունը, որը բավական լուրջ աշխատանք էր ենթադրում կատարել կառույցի արդիականացման ուղղությամբ: Ինքը՝ Նիկոլ Փաշինյանն էլ, բազմիցս այս ընթացքում հայտարարել է, որ ՀայՓոստը վերջին տարիներին զգալի առաջընթաց է գրանցել ծառայությունների մատուցման օպտիմալացման ուղղությամբ և ընդհանրապես, վարչապետի կարծիքով այս կառույցը Հայաստանի բրենդներից մեկն է՝ իր որակով և մասշտաբներով:

Փաստորեն Ռոմանոս Պետրոսյանը, ով ըստ Փաշինյանի կոչված է լինել պետական կառույցներում իր աչքերը, իր բացահայտումով լրջագույն հարված հասցրեց Նիկոլ Փաշինյանի բրենդին՝ ի ցույց դնելով այն կոռուպցիոն սխեմաները, որոնցից անմասն չէր մնացել նաև Փաշինյանի կողմից այդքան մեծ գովասանքի արժանացած ՀայՓոստը: