ՔՊ-ականների չկատարած խոստումները «թունավորում» են երևանցիներին

2018 թվականից ի վեր Երևանի ՔՊ-ական քաղաքապետերը հանրությանը հրամցնում են աղբի վերամշակման գործարան ունենալու իրենց կայսերական նախագիծը: Նախագիծը, սակայն, այդպես էլ գրվեց սառույցին, իսկ երևանցիները այսօր ստիպված են հաշտվել քաղաքում տարածվող աղբի անուշաբույրության հետ: Եվ դա էլ դեռ խնդրի կեսն է․ երեկ, դիցուք, հրդեհ է բռնկվել Նուբարաշենի աղբավայրում, որը մինչ այս պահը չի հաջողվել մարել: Հրդեհի տարածքը տեղայնացվել է, այժմ այնտեղ աշխատանքները շարունակվում են, սակայն, թե երբ կմարի հրդեհը՝ հնարավոր չէ ասել։ Հավանաբար, պատճառը տարիների ընթացքում կուտակված գազերն են, սակայն, այս պահին, վերջնական գնահատական տալ հնարավոր չէ;

Հիշեցնենք, որ 2018-ին Հայկ Մարությանը հայտարարում էր, որ աղբի վերամշակման գործարանի վերաբերյալ Երևանի քաղաքապետարանը ստացել է ու շարունակում է  ստանալ բազմաթիվ բիզնես-առաջարկներ՝ տարբեր ընկերությունների կողմից: Այն ժամանակ քաղաքապետի պաշտոնը զբաղեցնող Մարությանը պնդում էր, որ դրանք ուսումնասիրման փուլում են: Դարձյալ մասնագիտական համակողմանի դիտարկումների արդյունքում պետք է ընտրվեր այն ընկերությունը, որի փաթեթային առաջարկը ամենաընդունելին կլիներ քաղաքապետարանի համար՝ ելնելով բնապահպանական, քաղաքաշինական, առողջապահական և սոցիալական մի շարք չափորոշիչներից: Մարությանը, բնականաբար, իր այս խոստումը կյանքի չկոչեց, նրան փոխարինած Հրաչյա Սարգսյանը մոռացության մատնեց այդ նախագիծը և նրա ուշադրության կենտրոնում առավելապես տրանսպորտային ցանցի բարեկարգման ծրագրերն էին: Դե, իսկ ինչ վերաբերվում է Տիգրան Ավինյանին՝ վերջինս նախընտրական թոհուբոհի մեջ դեռևս չի հասցրել արտահայտվել այս խնդրի շուրջ:

Արդյունքում՝ ՔՊ-ականների չկատարած խոստումների հետևանքով թունավորվում են երևանցիները...