Զելենսկին ժամանել է Ճապոնիա

Ուկրաինայի նախագահ Վոլոդիմիր Զելենսկին ժամանել է Ճապոնիա՝ մասնակցելու G7-ի գագաթնաժողովին։ Այս մասին նա հայտնել է իր տելեգրամյան ալիքում։

«Ճապոնիա։ G7։ Կարևոր հանդիպումներ Ուկրաինայի գործընկերների և ընկերների հետ։ Անվտանգություն և համագործակցության ավելացում մեր հաղթանակի համար։ Այսօր խաղաղությունն ավելի կմոտենա»,- գրել է Զելենսկին։

Ճապոնիայի Հիրոսիմա քաղաքում G7-ի գագաթնաժողովը տեղի կունենա մայիսի 19-21-ը։ G7-ում ընդգրկված են ԱՄՆ-ն, Մեծ Բրիտանիան, Գերմանիան, Ֆրանսիան, Իտալիան, Կանադան և Ճապոնիան: Գագաթնաժողովին կմասնակցեն նաև Ավստրալիայի, Բրազիլիայի, Վիետնամի, Հնդկաստանի, Ինդոնեզիայի, Կուկի կղզիների, Կոմորյան կղզիների միության և Հարավային Կորեայի պատվիրակությունները։

Զելենսկին Ճապոնիա է ժամանել Ֆրանսիայի կառավարական ինքնաթիռով՝ Սաուդյան Արաբիայի Ջիդդա օդանավակայանից, որտեղ նախորդ օրը մասնակցել էր Արաբական լիգայի գագաթնաժողովին։