Բոլորն օրենքի առաջ հավասար են, սակայն ՔՊ-ականները՝ ավելի հավասար են

ՀՀ վարչապետ Նիկոլ Փաշինյանը չի հորդորել իր որդուն հետ վերցնել Գայանե Հակոբյանի դեմ ներկայացված բողոքը։ Նա այդ մասին հայտարարեց երեկ հրավիրված ասուլիսի ժամանակ` խոսելով որդու` Աշոտ Փաշինյանի առևանգման փորձի մասին։

 

«Երբ առաջին խոսակցությունը տեղի է ունեցել, իմ որդին զրկել է ինձ իրեն նման խնդրանքով կամ կոչով դիմելուց»,– նշեց Փաշինյանը։ Նրա խոսքով` երբ իրավական ընթացք է տրվել հարցին, ինքը երկրում չի եղել։ Երբ զրուցել է որդու հետ, նա իր ներկայացրած բողոքը հիմնավորել է այն հանգամանքով, որ իրենց պայքարի ամբողջ նպատակը հենց այն է եղել, որ ՀՀ-ում հարցերն իրավական ձևերով լուծվեն։

 

Ըստ Նիկոլ Փաշինյանի էլ՝ Հայաստանում բոլորը օրենքի առաջ հավասար են և եթե կատարել են որևէ խախտում, ապա պետք  է պատժվեն: Անշուշտ, դա այդպես է, միայն թե ոչ Նիկոլ Փաշինյանի ինտերպրետացիայով:

 

Բանն այն է, որ փաստերի պարզ համադրումը ստիպում է կասկածել վարչապետի նման հայտարարության՝ իրականությանը համապատասխանելու վրա, քանի որ, ինչպես տեսնում ենք, ՔՊ-ականները շատ հարցերում օրենք խախտելով մնում են անպատիժ: Վերջին դեպքը գրանցվեց հենց այսօր: Օրեր առաջ Սպիտակի խոշորացված համայնքի Սարամեջ բնակավայրի վարչական ղեկավարի ամուսնուն ծեծի ենթարկելու կասկածանքով ձերբակալված Գոռ Նիկողոսյանը ազատ է արձակվել, նրան այս պահի դրությամբ մեղադրանք առաջադրված չէ:

 

Հիշեցնենք՝ մայիսի 18-ին, կեսգիշերին մոտ, Սպիտակի բժշկական կենտրոն բուժօգնության էր դիմել 42-ամյա Էդգար Հովհաննիսյանը, որը Սպիտակ խոշորացված համայնքի Սարամեջ բնակավայրի վարչական ղեկավար Թամարա Մինասյանի ամուսինն է: Բժշկական կենտրոնում ստանալով առաջին բուժօգնություն՝ տղամարդը դուրս էր գրվել, սակայն հաջորդ օրը կրկին դիմել էր բուժօգնության, այնուհետ տեղափոխվել Երեւան, նրա մոտ ախտորոշվել էր ուղեղի ցնցում: Տեղի ունեցած վիճաբանություն-ծեծկռտուքի հետ կապված ձերբակալվել էր Սպիտակ խոշորացված համայնքի ղեկավարի որդին՝ Գոռ Նիկողոսյանը:

Ստացվում է, այն ինչ չի կարելի որդեկորույս ծնողներին, թույլատրվում է ՔՊ-ական քաղաքապետերի որդիներին...