«Աղբի մաֆիայի» դեմ հանցագործության մասին հաղորդումը մնաց «աննկատ»

Աղբավայրում բռնկված հրդեհի մարման հարցը, խնդրում եմ, մեկ շաբաթից շուտ կարգավորել, քանի որ խոսքը թունավոր ծխի մասին է։ Այս մասին այսօր՝ մայիսի 23-ին, Երևան քաղաքի ավագանու նիստի ժամանակ ասաց ավագանու անդամ Լևոն Զաքարյանը՝ հավելելով, որ հրդեհի բռնկումից հետո նաև խոսակցություններ են տարածվել, համաձայն որոնց՝ կան որոշակի խմբավորումներ, որոնք միմյանց միջև բաժանել են աղբավայրի տարածքն ու կա հավանականություն, որ հրդեհի պատճառն այդ խմբերի միջև տարածքը չկիսելն է եղել։

«Արձանագրենք մի փաստ, որ Երևանի աղբավայրում ինչ-որ «մաֆիոզ» խմբեր կան, որոնք աղբավայրը կիսել են իրար մեջ և այնտեղից իրենց համար պիտանի բաներ են հանում, իսկ իրենց միջև եղած խնդիրների պատճառով կարող են նաև հրդեհել աղբավայրն ու երևանցիներին ասեն՝ 10 օր այդ ծուխը շնչեք», - ասաց Զաքարյանը՝ հարց ուղելով, թե այդ պարագայում ինչով է զբաղվում «Նոր աղբավայր» ՓԲԸ-ն և ինչպես են վերոնշյալ անձինք հայտնվում աղբավայրի տարածքում։

Պատասխանելով ավագանու անդամի հնչեցրած հարցին՝ Երևանի քաղաքապետի խորհրդական Կամո Արեյանը նշեց, որ նման վարկածները մեկնաբանելու, եզրակացություն տալու, դրանց ճշմարտացիությունը կամ ոչ ճշմարտացի լինելը հիմնավորելու պատասխանատվություն չի կարող վերցնել, քանի որ այդ ուղղությամբ արձանագրված որևէ փաստ կամ հաղորդում չի եղել։Սակայն ինչ էր ավագանու անդամի հայտարարությունը, եթե ոչ հաղորդում հանցագործության մասին, որը աննկատ թողեցին թե Արեյանը, թե փոխքաղաքապետ Ավինյանը: Մինչդեռ հենց նրանք են գրեթե յուրաքանչուր օր խոսում նմանատիպ երևույթները արմատախիլ անելու և օրենքի գերակայության մասին: Փաստորեն՝ երբ պետք է գերակայում է, իսկ երբ ոչ՝ կարելի է չնկատելու տալ և անցնել առաջ...