Արսեն Թորոսյանը պատրաստվում է համալրե՞լ ընդդիմության շարքերը

ՔՊ-ական պատգամավոր Արսեն Թորոսյանը գործադիրից խորհրդարան տեղափոխվելուց հետո բավական լարված հարաբերությունների մեջ է թիմակիցների հետ: Ընդ որում, ինքը՝ Թորոսյանը, կարծես չի էլ փորձում թաքցնել այդ հանգամանքը: Բանն այն է, որ վերջինս, ընդդիմադիր պատգամավորներից առավել հաճախ և սուր է քննադատում ՔՊ-ականներին կամ վերջինիս կողմից այս կամ այն պաշտոնում ընտրված պաշտոնյաներին:

Դիցուք՝ ԱԺ առողջապահության հարցերի մշտական հանձնաժողովի նիստում առողջապահության նախարար Անահիտ Ավանեսյանի կողմից կառավարության 2021-2026 թթ. ծրագրի 2022 թ. կատարման ընթացքի և արդյունքների մասին զեկույցի ներկայացումից հետո  Արսեն Թորոսյանը այդ զեկույցում սխալ էր հայտնաբերել և չէր զլացել այդ մասին հրապարակային հայտարարել:

Մինչ այդ էլ Թորոսյանը գրառում էր արել, որտեղ բողոքում էր, որ այս երկրում լավություն անելը կարող է ավարտվել բանտով: Թորոսյանը հրապարակման վերջում համոզմունք է հայտնել, որ հայաստանյան իրավապահ համակարգը չի թոթափել երբեմնի սովետական ստերեոտիպը, եւ որ ապացույցների բացակայության դեպքում հարուցված վարույթները կարճելը նախաքննական մարմնի վատ աշխատանքի հետեւանք է, եւ հետեւաբար, ամեն գնով դրանք պետք է առաջ գնան:

Այսօր էլ Թորոսյանը քննադատել է ԲԴԽ նախագահին՝ բողոքելով, որ վերջինս իր գործուղումները այնպես չի դասավորում, որ որպես հիմնական զեկուցող ներկայանա ԱԺ։

Ինչպես երևում է, ամեն բան գնում է նրան, որ Արսեն Թորոսյանը իսկապես կհամալրի ընդդիմության շարքերը, քանի որ անգամ ընդդիմությունից ՔՊ-ականները այսքան քննադատություն չեն լսում, որքան սեփական թիմակցից...