Կանանց իրավունքների «պաշտպանների» պոպուլիզմն ու երկակի ստանդարտները

ՔՊ-ական պատգամավոր Զառա Բաթոյանը երեկ գրառում է արել, որտեղ իր մտահոգությունն է հնչեցրել կալանավայրերում պահվող կանանց իրավունքների խախտման դեպքերի առթիվ: Նա մասնավորապես գրել է, որ  յուրաքանչյուր ոք ունի բժշկական խորհրդատվություն և ծառայություններ ստանալու իրավունք վերարտադրողական և սեռական առողջության հարցերի շուրջ՝ մեկուսի ու գաղտնի պայմաններում: Այս իրավունքն ամրագրված է «Վերարտադրողական առողջության և վերարտադրողական իրավունքների մասին» ՀՀ օրենքով։ Սակայն շատ բժշկական հաստատություններում մեկուսիության և գաղտնիության պայմանները չեն ապահովվում։ Պացիենտները հաճախ ստիպված են լինում խիստ անձնական, ինտիմ բնույթի տեղեկությունները հայտնել նույն սենյակում աշխատող այլ բժշկի, ինչպես նաև հերթում սպասող այլ պացիենտների ներկայությամբ, ինչը պացիենտների անձնական կյանքի գաղտնիության կոպտագույն խախտում է: Նկատի ունենալով, որ Կառավարության առաջնահերթություններից է ժողովրդագրության իրավիճակի բարելավման, ծնելիության խթանմանն ուղղված քաղաքականությունը, պետք է համապատասխան պայմաններ ստեղծվեն կանանց սեռական և վերարտադրողական առողջության իրացման համար։ 

Կանանց իրավունքների պաշտպանության մեկ էլ առաջամարտիկ էլ ՔՊ-ական պատգամավոր Լենա Նազարյանն է: Մինչ հեղափոխությունը և դրանից հետո էլ նա բառի բուն իմաստով ակտիվիստ էր և հայտարարում էր, որ կանանց իրավունքները անտեսելու այլևս որևէ իրավունք չունենք:

Շատ լավ է, որ Զառա Բաթոյանը հետաքրքրված է կալանավայրերում պահվող կանանց բժշկական խորհրդատվություն և ծառայություններ ստանալու իրավունքով, շատ լավ է որ Լենա Նազարյանը ևս կանանց իրավունքների պաշտպանության առաջամարտիկ է, սակայն, առնվազն տարակուսելի է, որ վերջիններս բառ անգամ չեն ասել հանուն հայրենիքի պաշտպանության նահատակված զինվորի մորը կալանավորելու վերաբերյալ: Գայանե Հակոբյանը նույնպես կին է, նույնպես կալանավայրում է, ունի առողջական խնդիրներ և ունի իրավունքներ: Իրավունքներ, որոնցից օր ու գիշեր խոսում են վերը նշված ակտիվիստ պատգամավորները, սակայն, ինչպես երևում է, նրանց սրտացավությունը և ակտիվիզմը խիստ ընտրովի և արտահայտվում է վառ ընդգծված երկակի ստանդարտների կիրառմամբ...