Փաշինյանի իշխանության թուլացո՞ւմ, թե՞՝ ստվերային համագործակցություն

Այսօր ուշագրավ հայտարարությամբ է հանդես եկել ԴԱՀԿ նախկին պետ, այժմ հետախուզման մեջ գտնվող Միհրան Պողոսյանը: Վերջինս նշել է, որ սույն թվականի մայիսի 13-ին՝ տեղեկանալով ՀՀ տարածքում գտնվող բանանի պահեստում շուրջ 1 տոննա կասկածելի զանգվածի առկայության մասին, անմիջապես ձեռնամուխ է եղել համապատասխան քայլեր ձեռնարկելուն։

Մասնավորապես, զանգահարել է ՀՀ ԱԱԾ տնօրենի ընդունարան, արդյունքի չհասնելով՝ քիչ անց ձայնային հաղորդագրություն է ուղարկել ԱԱԾ տնօրենի բջջային հեռախոսահամարին, որից հետո՝ կարճ ժամանակ անց, Արմեն Աբազյանը զանգահարել է իրեն։ Հեռախոսազրույցի ընթացքում Պողոսյանը տեղեկացրել է նրան, որ բանանի ներմուծմամբ զբաղվող իր մտերիմի ընկերության աշխատակիցները կոնտեյների մեջ՝ ակնկալվող բանանի փոխարեն, հայտնաբերել են խոշոր ծավալի անհայտ ծագման փոշենման զանգված։ Տեղեկացրել է նաև, որ ընկերության տնօրենը՝ փաստաբանական խմբի հետ միասին, ԱԱԾ շենքի դիմաց է և ցանկանում է հաղորդում տալ։ ԱԱԾ պետին խնդրել է ընդունել հաղորդումն ու արագ ընթացք տալ գործին:

Սակայն, ընթացք որպես այդպիսին չի տրվել, ավելին՝ այսօր հայտնի դարձավ, որ վերը նշված ընկերության տնօրենը կալանավորվել է: Ուշագրավն այն է, որ Պողոսյանը փաստացի ինքն իր շուրթերով ընդունում է, որ տեղյակ է եղել կոնտեյներներում առկա կոկայինի առկայության մասին: Դա էլ դեռ բավարար չէ՝ հետախուզման մեջ գտնվող Պողոսյանը առանց քաշվելու զանգահարում է ԱԱԾ պետին և վերջինիս հետ զրույց ունենում: Սա իրապես նոնսենս է բոլոր երկրների համար, սակայն, Հայաստանը թերևս այս հարցում էլ է որոշել առանձնանալ: Այժմ գլխավոր հարցը այն է՝ Նիկոլ Փաշինյանի իշխանությո՞ւնն է այդչափ թուլացել, որ վերջինիս քթի տակ հետախուզվող անձին փոխկապակցված ընկերությունը անում է այն ինչ ուզում է, թե՞՝ ամեն դեպքում գործ ունենք որոշակի ստվերային համաձայնությունների հետ որոնց ջրի երես դուրս գալուց հետո կողմերը փորձում են մեղքը բարդել մեկը մյուսի վրա...