Անահիտ Մանասյանը որոշել է զբաղվել միայն «անշառ» խնդիրներով

Վերջերս ՄԻՊ պաշտոնը ստանձնած Անահիտ Մանասյանը խորհրդարանի ամբիոնից խոստանում էր լինել ՀՀ բոլոր քաղաքացիների իրավունքների պաշտպանը: Սակայն, որքան անցնում է ժամանակը, այնքան ավելի հստակ է դառնում, որ Մանասյանը նախընտրում է հեռու մնալ այսպես կոչված շառոտ թեմաներից և զբաղվել միայն անշառ և ապաքաղաքական հարցերով:

Օրինակ՝ վերջինս ավետել է, որ իր ջանքերով վերականգնվել է քաղաքացու նպաստը, կամ կրթություն ստանալու իրավունքը: Այս ամենը, անշուշտ, ողջունելի է և որքան ավելի մեծ թվով քաղաքացիների իրավունքներ վերականգնվեն, այնքան ավելի լավ:

Սակայն, դրա հետ մեկտեղ ակնհայտ է, որ երկրում առկա են շատ ավելի լուրջ և սուր խնդիրներ, որոնց շուրջ ցանկալի կլիներ և նույնիսկ անհրաժեշտ է լսել ՄԻՊ կարծիքն ու գնահատականները:

Օրինակ այն, որ իշխանությունները ձեռքերը լվանում են Արցախից, կամ որ առաջ են եկել այսպես կոչված անկլավներ հանձնելու թեզերը: Այդ գյուղերում, որոնք Փաշինյանի թեթև ձեռքով կարող են հայտնվել Ադրբեջանի վերահսկողության տակ, նույնպես ՀՀ քաղաքացիներ են ապրում, սակայն, նրանց իրավունքները ՄԻՊ-ը, չգիտես ինչու, նույն էնտուզիազմով և օպերատիվությամբ լուծել չի ցանկանում. ինչպես ասում են՝ շառից հեռու...