«Արարատի գյուղատնտեսության համար այս տարին նախադեպը չունեցող տարի էր»,- Արարատի մարզպետ Էդիկ Բարսեղյան

Քաղաքամայր Արտաշատը, ինչպես գիտենք, այսօր տոնական տրամադրության կիզակետում է: Մարդիկ տոնում են շուրջ 500 տարի Հայաստանի մայրաքաղաք եղած Արտաշատի 2200 ամյակը:

Այս կապակցությամբ քաղաքում այսօր արվել էր հնարավոր ամենը՝ Արտաշատին հնամյա քաղաքային շունչ հաղորդելու, ներկաներին քաղաքի պատմությանը ծանոթացնելու, մարդկանց ժպիտներ պարգևելու ուղղությամբ:

«Ես նախ կցանկանայի շնորհավորել այս մեծ տոնը՝ Արտաշատի 2200 ամյակը և կուզեմ շեշտել, որ Արարատի մարզի բնակչությունը չափազանց աշխատասեր և արարող ժողովուրդ է: Նկատելի է, որ մեր ամբողջ տարվա աշխատանքի վերջնական արդյունքը այսօր այստեղ ենք մենք ամփոփում»,- ԼՈՒՐԵՐ.com-ի թղթակցի հետ զրույցում բերքի տոնը խորհրդաշնող տաղավարների մոտ շրջելիս նշեց Արարատի մարզպետ Էդիկ Բարսեղյանը:

Նա չցանկացանալով երկար խոսել քաղաքի պատմական նշանակության մասին, միայն նշեց, որ ժամանակին Արտաշատն այն մայրաքաղաքն է եղել, որ շուրջ 150 հազար բնակչություն է ունեցել և պատմական կարևորագույն որոշումները այստեղ են կայացվել:

Արտաշատում կարևորագույն հիմնախնդիրներից է քաղաքի լճի վերակառուցումը, որի նախապատրաստական աշխատանքները մեկնարկել են ընթացիկ տարվա հուլիսի 6-ին, նախագահի՝ Արարատի մարզ կատարած այցի ընթացքում տրված հանձնարարականներից հետո:

Արտաշատի երբեմնի այցեքարտը համարվող լիճը, որը կառուցվել է դեռևս 1971 թվականին, վերածվել է գարշահոտ ճահճացած տարածքի: «Հայջրնախագիծ» ինստիտուտի կողմից կատարված ուսումնասիրության համաձայն, լճի վերակառուցմամբ հնարավոր է լուծել քաղաքի համար կարևոր էկոլոգիական խնդիրը, որի համար կպահանջվի շուրջ 235 մլն դրամ:

«Այսօր նախագահը տեսավ աշխատանքների ընթացքը և հանձնարարական տվեց, որ 2012 թ.-ի վերջին զանգի ժամանակ լճի շինարարական աշխատանքները պետք է ավարտված լինեն, լիճը պետք է դառնա հանգստյան գոտի' իր բոլոր հարմարություններով»,- նշեց մարզպետը:

«Ատիճանաբար լուծվում են մեր մարզի խնդիրները, այս տարի գյուղատնտեսության համար գյուղմթերքների արտադրության և իրացման հետ կապված նախադեպը չունեցող տարի էր, շուտով խաղողի մթերումն էլ կավարտվի»,- ոգևորությամբ նշեց Էդիկ Բարսեղյանը:

Մարզպետը առավել կարևորեց արարատցիների միասնականության գաղափարը, նշեց, որ իրենք ամենն անում են մարդկանց բարձր տրամադրությունն ապահովելու համար և առաջարկեց շրջել բերքառատ տաղավարներով ու համտեսել արարատյան արևով սնված բարիքները: