Պարոն Ավինյան, իսկ «Հայր մեր»-ը գիտեք՞

Երևանի փոխքաղաքապետ Տիգրան Ավինյանը այսօր տեղի ունեցած գործակարգավարական նիստի ընթացքում հանկարծակի կերպով հիշել էր, որ Երևանում բարդիներ և ընդհանրապես՝ հին ծառատեսակներ հատելը ապօրինի է և ըստ այդմ առիթը բաց չթողնելով հոխորտացել էր քաղաքապետարանի այն պատասխանատու օղակների վրա, որոնց աչքից վրիպել էր  Սայաթ-Նովա պողոտայում երկու անձի կողմից ապօրինի հատված 3 հսկայական բարդիների դեպքը:  «Ստացվում է՝ տեխնիկական խնդրի պատճառով հաստաբուն բարդիները հատվել են։ Պետք է խնդրեմ սկսել ծառայողական քննություն՝ հասկանալու, թե ում պատճառով է եղել տեխնիկական խնդիրը։ Թեժ գիծ զանգ է եղել, որին պետք է անմիջապես արձագանքել։ Չենք կարող սպասել այդ ծառերը հատվեն, նոր միայն փաստ արձանագրենք, որից հետո 2 կամ 5 միլիոն տուգանք լինի. Թեժ գծից եկած զանգերը ձեզ համար պետք է Աստվածաշունչ լինեն, դրանից կարևոր բան չկա, ես եթե բան եմ ասում, թեժ գծից եկած զանգը ավելի կարևոր է»,–ասաց Ավինյանը։

Ուշագրավն այն է, որ ընդամենը մի քանի շաբաթ առաջ քաղաքապետարանը՝  ինքն էր հին և հաստաբուն ծառերի «սպանդ» սկսել Երևանի կենտրոնում, պնդելով որ այդ ծառերը իրենց ֆունկցիան այլևս չեն կատարում: Թեև հանրությանը փորձում էին համոզել, որ ծառերի ջարդը ունի բնապահպանական հիմնավորում՝ փորձագիտական շրջանակներից այդ հիմնավորումների մեծ մասը հերքվեցին: Քաղաքապետարանում էլ հասկանալով, որ ավագանու ընտրությունների նախաշեմին Երևանում օրը ցերեկով կազմակերպած էկոցիդը լավագույն փիառ ակցիան չէ՝ ոտքները կախ գցեցին:

Փաստենք սակայն, որ Ավինյանը ոչ միայն բնապահպանական խնդիրների մասին է հիշել, այլ նաև Աստվածաշնչի: Դժվար է ասել, գուցե Ամենայն Հայոց Կաթողիկոսի հետ հանդիպումն է այդպես ազդել նրա վրա, սակայն, վերջինս այնքան հեռու է գնացել, որ հասել է կրոնադավանաբանական դիսկուրսին: Մի քանի շաբաթ առաջ էլ Ավինյանը պատարագի առաջին շարքերում էր լուսանկարվում: Առաջին նախագահ Լևոն Տեր-Պետրոսյանը, ով ինքն էլ է հաճախակի և մեծ սիրով հղում անում Աստվածաշնչին, շաբաթներ առաջ հոդված էր հրապարակել՝ «Նիկոլ Աստվածաբանի հայտնությունը» վերտառությամբ: Ինչպես երևում է այժմ էլ գործ ունենք «Տիգրան Ավինյան աստվածաբանի» հայտնության հետ...

Այստեղ երկու հարց է առաջանում՝ որն՞ է նիստի ընթացքում վարչության աշխատակիցների վրա հոխորտալու իմաստը, եթե մի ամբողջ քաղաքապետարան շաբաթներ շարունակ ինքն էր զբաղված ծառեր ոչնչացնելով և երկրորդը՝ արդյոք՞ Աստվածաշնչի մասին պարբերաբար հիշող Ավինյանը գիտի տերունական «Հայր Մեր»-ը...

Հարցերը հռետորական են, իսկ քաղաքապետարանի շոուները ինչպես տեսնում ենք՝ շարունակվում են...