Սյունիքի մարզպետը դիստանցիա՞ է պահում ՔՊ-ից և ՔՊ-ականներից
ՎերլուծականՎերջին շրջանում դիտարկելով Սյունիքի մարզպետ Ռոբերտ Ղուկասյանի հայտարարություններն ու քայլերը` տպավորություն է ստեղծվում, որ վերջինս, չնայած զբաղեցրած բարձր պաշտոնին, ամեն կերպ փորձում է դիստանցիա պահել ՔՊ-ից և ՔՊ-ականներից:
Առաջին քայլը, որ վկայեց այդ մասին փոխմարզպետի նշանակումն էր: Բնականաբար, այդ պաշտոնի համար անչափ թեժ պայքար էր ընթանում ՔՊ-ականների շրջանում, սակայն, արի ու տես, որ այդ պաշտոնին նշանակվեց Նարե Ղազարյանը: Նա սոցիալական հարթակներում հաճախ քննադատել է այսօրվա իշխանությանը։ Եվ հակաիշխանական իր գրառումներով աչքի ընկնող Նարե Ղազարյանի նշանակումը փոխմարզպետի պաշտոնում շատերի մոտ զարմանք է առաջացրել, և շատերի կարծիքով` այդ նշանակումը հենց Ղուկասյանի սրտով էր:
Բացի այդ, Ռոբերտ Ղուկասյանը գրեթե չի հանդիպում ՔՊ-ական համայնքապետերի հետ, փոխարենը օրերս շրջայց էր կատարել Որոտանով՝ Գորիսի համայնքապետ Առուշ Առուշանյանի հետ, ով, հիշեցնենք, ընդդիմադիր ճամբարից է:
Սյունիքի ՔՊ-ականների ճամբարում արշալույսները արդեն երկար ամիսներ է ինչ խաղաղ չեն: ՔՊ-ականները որպես Սյունիքի մարզպետ դիտարկում են ԱԺ «Քաղաքացիական պայմանագիր» խմբակցության պատգամավոր Դավիթ Դանիելյանի թեկնածությունը, որը մտերմիկ հարաբերություններ ունի պաշտպանության նախարար Սուրեն Պապիկյանի ու վարչապետի աշխատակազմի ղեկավար Արայիկ Հարությունյանի հետ: Ինչպես երևում է՝ մարզպետ Ղուկասյանը չի պատրաստվում այդքան հեշտ զիջել իր դիրքերը:
ՔՊ-ից և Նիկոլ Փաշինյանի վարած քաղաքականությունից դիստանցիա պահելու ցանկության մասին են խոսում նաև մարզպետի հայտարարությունները, որոնք, մեղմ ասած, իշխող քաղաքական թիմի ընդհանուր դիսկուրսից շեղվում են: Եթե Փաշինյանը ու ՔՊ-ականները փորձում են ապացուցել, որ Սև լճի համար պատերազմ սկսելը անմտություն էր, ապա Ղուկասյանը հայտարարում է, որ Սյունիքը պատրաստվում է ինքնապաշտպանության, ասել է թե՝ նա իր դիրքորոշումն է հայտնել Փաշինյանի հանձնողական քաղաքականության վերաբերյալ:
Դժվար է ասել՝ կալավանցի մարզպետն է որոշ դաժան ճշմարտություններ հասկացել ի վերջո, թե ներթիմային պայքարի արդյունքն է, սակայն ակնհայտ է, որ Ռոբերտ Ղուկասյանն առնվազն փորձում է դիստանցիա պահել ՔՊ-ից և ՔՊ-ականներից: