Ռուստամ Բադասյանը և Արմեն Գրիգորյանը համալրեցին «արտոնյալների» շարքերը

Կառավարությունն այսօրվա՝ հունիսի 1-ի նիստում ավելացրեց այն տրանսպորտային միջոցների ցանկը, որոնք ենթակա են կահավորման կապույտ առկայծող փարոսիկներով կամ կապույտ կամ կապույտ և կարմիր առկայծող փարոսիկներով։ Հիմնավորման մեջ նշվում է, որ ՀՀ հակակոռուպցիոն կոմիտեն օժտվել է քրեադատավարական և օպերատիվ-հետախուզական գործունեություն իրականացնելու լիազորություններով։ Իսկ Պետական եկամուտներին կոմիտեն, չնայած ունի նման գործառույթ, բայց ներառված չի եղել ցանկում։

Ցանկում ներառված չեն նաև Անվտանգության խորհրդի անդամների և վարչապետի աշխատակազմի ղեկավարի տրանսպորտային միջոցները, այնինչ վերջիններիս բնականոն գործունեության ապահովման անհրաժեշտություն է առկա: Ուստի ԱԽ գրասենյակը, Պետական եկամուտների կոմիտեի տրանսպորտային միջոցներին կապույտ առկայծող փարոսիկներով կահավորելու իրավասություն տրվեց։ Նշվում է, որ շտապ օգնության, հրդեհային, զինվորական, փրկարար ծառայությունների և իրավակարգի ու անվտանգության ապահովման մարմինների տրանսպորտային միջոցները համարվում են օպերատիծ ծառայությունների տրանսպորտային միջոցներ, իսկ բոլոր տեսակի օպերատիվ ծառայությունների տրանսպորտային միջոցների առկայծող փարոսիկները պետք է լինեն կապույտ գույնի։

Բնականաբար, ժամանակին Նիկոլ Փաշինյանը քննադատում էր ընդհանրապես ծառայողական մեքենաների առկայությունը, էլ չենք խոսում՝ տարատեսակ պաշտոնյաներին առանձնահատուկ կարգով նման արտոնություններ շռայլելը:

Այժմ ոչ միայն ծառայողական մեքենաների քանակն է կտրուկ ավելացել, այլ նաև արտոնյալ պայմաններով երթևեկող պաշտոնյաների թիվը..