Թուրքիայի նախագահի երդմնակալությանը կմասնակցեն աշխարհի ավելի քան 80 երկրների ներկայացուցիչներ. Փաշինյանը պատվավոր հյուրերի ցանկում է

Թուրքիայի նախագահ Ռեջեփ Թայիփ Էրդողանի երդմնակալության արարողությանը, որը տեղի կունենա հունիսի 3-ին` Անկարայի նախագահական համալիրում, կմասնակցեն 21 պետությունների ղեկավարներ և 13 վարչապետներ, ինչպես նաև բազմաթիվ նախարարներ և միջազգային կազմակերպությունների ներկայացուցիչներ, այդ թվում՝ Թուրքական պետությունների կազմակերպությունը, ՆԱՏՕ-ն և Իսլամական համագործակցության կազմակերպությունը, գրում է Anadolu-ն։

Նախագահական ընտրություններում 27 834 589 ձայնով հաղթած նախագահ Էրդողանը հունիսի 3-ին՝տեղական ժամանակով ժամը 14:00-ին, Թուրքիայի Ազգային մեծ ժողովում կմասնակցի երդման արարողությանը։

Արարողությանը ներկա կլինեն Ադրբեջանի նախագահ Իլհամ Ալիևը, Վենեսուելայի նախագահ Նիկոլաս Մադուրոն, Բուլղարիայի նախագահ Ռումեն Ռադևը, Գաբոնի նախագահ Ալի Բոնգո Օնդիմբան, Գվինեա-Բիսաուի նախագահ Ումարո Սիսոկո Էմբալոն, Հարավային Աֆրիկայի նախագահ Սիրիլ Ռամաֆոսան, Չեռնոգորիայի նախագահ Յակով Միլատովիչը, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ջապարովը, Կոնգոյի նախագահ Դենիս Սասու Նգեսսոն, Կոսովոյի նախագահ Վյոսա Օսմանին, ՀԿԹՀ նախագահ Էրսին Թաթարը, Հյուսիսային Մակեդոնիայի նախագահ Ստևո Պենդարովսկին, Ուզբեկստանի նախագահ Շավքաթ Միրզիյոևը, Ռուանդայի նախագահ Փոլ Կագամեն, Սենեգալի նախագահ Մակի Սալլը, Սոմալիի նախագահ Հասան Շեյխ Մահմուդը, Տոգոյի նախագահ Էսոզիմնա Գնասինգբեը, Թուրքմենստանի նախագահ Սերդար Բերդիմուհամեդովը, Բանգլադեշի նախագահ Մոհամմադ Շահաբուդդին Չուպպուն, Գվինեայի նախագահ Մամադի Դումբուան:

Պատվավոր հյուրերի ցանկում են 13 վարչապետներ, այդ թվում՝ Հայաստանի վարչապետ Նիկոլ Փաշինյանը, Պակիստանի վարչապետ Շահբազ Շարիֆը, Հունգարիայի վարչապետ Վիկտոր Օրբանը  և Լիբիայի վարչապետ Աբդուլհամիդ Դիբեբեն։