Վահան Քերոբյանը գովազդում է նախկին ՀՀԿ-ական պատգամավոր Աշոտ Արսենյանի ընտանեկան բիզնեսը

Էկոնոմիկայի նախարար Վահան Քերոբյանն օրերս իր ֆեյսբուքյան էջում գրառում էր կատարել, որով ավետում էր, որ Ջերմուկում իրականացվում է 15 միլիոն դոլար արժողությամբ ներդրումային ծրագիր` բազմաֆունկցիոնալ հյուրանոցային համալիրում։ Սակայն,  ուշագրավն այս պատմության մեջ այն է, որ շինարարական աշխատանքները իրականացնում է Աշոտ Արսենյանի ընտանիքին պատկանող «Ջերմուկ Գրուպ»–ը` իր ֆինանսական միջոցներով։ Դիցուք` Ջերմուկում կկառուցվի նոր բնակելի թաղամաս՝ բաղկացած մոտ 300 բնակարանից։ Ծրագրի նախագիծը արդեն կա, իսկ կառուցապատման աշխատանքների մեկնարկը կտրվի 2022 թվականի մայիս ամսից։ Ծրագիրը իրականացվում է «Ջերմուկ Գրուպ» ընկերության կողմից։ Բացի այդ, վերանորոգվում է նաև «Ջերմուկ Գրուպ» ընկերության կողմից գնված Ջերմուկի «Գլաձոր» առողջարանը, որը, արդեն երկար տարիներ է, ինչ աշխատում է մասամբ և սեզոնային։ 

Այսինքն՝ Ջերմուկի համայնքապետ Վահագն Արսենյանն իր ընտանեկան բիզնեսին զարկ տալու նպատակով  ներդրում է կատարում իր իսկ ղեկավարած համայնքում, իսկ էկոնոմիկայի նախարարությունը ոչ միայն այստեղ որևէ արտառոց երևույթ, կամ օրինակ՝ կոռուպցիոն ռիսկ չի տեսնում, այլ մի բան էլ նախարարի մակարդակով գովազդում է նախկին ՀՀԿ-ական պատգամավորի ընտանիքի բիզնես պրոյեկտը: Հասկանալի է, որ հիմնական շահառուն այս ծրագրի հենց «Ջերմուկ Գրուպ»–ն է, քանի որ հենց այս ընկերությունն է հետագայում իր համար հսկայական եկամուտներ ապահովելու: Սակայն, հպարտանալու առանձնակի առիթներ չունեցող Վահան Քերոբյանին դա էլ չի խանգարում զբաղվելու այն պաշտոնյայի բիզնես ծրագրերի լոբբինգով, ով անցնում է մի շարք քրեական գործերով...