Արմեն Գրիգորյանը «սրբագրում» է իր հակառուսական հայտարարությունները

ԱԽ քարտուղար Արմեն Գրիգորյանը երեկ Հ1-ի եթերում տված հարցազրույցի ընթացքում սրբագրել էր իր՝ շաբաթներ առաջ արված հայտարարությունը կապված ՌԴ կողմից իր դաշնակցային և պայմանագրով ստանձնած պարտավորությունները չկատարելու, մասնավորապես՝ զենք չմատակարարելու հետ: «Նովայա գազետա Եվրոպա» պարբերականին տված հարցազրույցում ՀՀ ԱԽ քարտուղար Արմեն Գրիգորյանը նշել էր, որ նոր մեխանիզմներ եւ սպառազինության մատակարարումներ են անհրաժեշտ, քանի որ Հայաստանը չի ստանում այն, ինչ պատվիրել ու վճարել է Ռուսաստանին։ Երեկ Գրիգորյանը փորձեց սրբագրել այդ հայտարարությունը՝ որպես զենք չմատակարարելու պատճառ նշելով Ուկրաինայում ընթացող պատերազմը: Ասել է թե՝ ռուսական կողմը ցանկանում է, սակայն ինքն էլ այս պահին չունի զենքի անհրաժեշտ խմբաքանակը:

Սա առաջին դեպքը չէ, երբ Արմեն Գրիգորյանը հակառուսական հայտարարություններ է անում, այնուհետև փորձում այսպես ասած՝ կրուտիտներ հնարել՝ ասվածը սրբագրելու նպատակով: Մի քանի ամիս առաջ էլ ԱԽ քարտուղարը հայտարարել էր, որ Հայաստանին ստիպում են մտնել միութենական պետություն: Այս հայտարարությունը հերքեց անձամբ Նիկոլ Փաշինյանը, իսկ ռուսական կողմի խիստ միանշանակ արձագանքից հետո էլ ԱԽ քարտուղարը ստիպված էր փոքր–ինչ սրբագրել իր իսկ արած ձևակերպումները:

Սակայն, սա էլ վերջին տարակուսելի հայտարարությունը չէր:  Շաբաթներ առաջ Հ1-ի եթերում ԱԽՔ Արմեն Գրիգորյանը հակառուսական քարոզչությունն ավարտել է սենսացիոն հայտարարությամբ: Ասել է, որ եռակողմ հայտարարությամբ Լաչինի միջանցքը «պատկանում» է ՌԴ-ին, «եւ Լաչինի միջանցքում տեղի ունեցող բոլոր իրադարձությունների պատասխանատվությունը կրում է Ռուսաստանի Դաշնությունը»։ Սակայն նոյեմբերի 9-ի հայտարարության տեքստում ասված է․ «Լաչինի միջանցքը (5 կմ լայնությամբ), որն ապահովելու է ԼՂ կապը Հայաստանի հետ եւ միաժամանակ շրջանցելու է Շուշի քաղաքը, մնում է ՌԴ խաղաղապահ զորակազմի վերահսկողության ներքո»։ ԱԽՔ-ի հայտարարությունից կարելի է ենթադրել, որ ՀՀ իշխանությունները նոյեմբերի 9-ի տեքստը հետագայում խմբագրել են` Լաչինի միջանցքը տալով ՌԴ-ին, սակայն այդ մասին հանրությանը չեն տեղեկացրել: