Ֆինանսների նախարարը ցրեց Փաշինյանի հերթական մանիպուլյատիվ միֆը

Հայաստանը Եվրոպական միության հետ համաձայնություն ունի 2.8 մլրդ եվրո տրամադրելու վերաբերյալ, բայց ասել են` կարող է տրամադրվել, եթե լինեն համապատասխան ծրագրեր։ Այս մասին այսօր՝ հունիսի 5-ին, Եվրոպական ինտեգրման հարցերի եւ Ֆինանսավարկային և բյուջետային հարցերի մշտական հանձնաժողովների համատես նիստում 2022 թվականի կատարողականի հաշվետվության նախնական քննարկումների ժամանակ ասաց ՀՀ ֆինանսների նախարար Վահե Հովհաննիսյանը։

«ԵՄ–ի հետ համաձայնություն ունենք։ Նպատակ է դրվել ձևավորվել այն ծրագրերի շրջանակը, որոնք պետք է ֆինանսավորվեն։ 1 օրում, 1 ամսում կամ 1 տարում հնարավոր չէ 2.8 մլրդ եվրոյի ծրագիր նախագծել։ Շարունակական աշխատանք է տարվում, և, որտեղ կա պատրաստի ծրագիր, ֆինանսավորվում է»,– ասաց Հովհաննիսյանը։

Նա նաև ներկայացրեց ԵՄ–ից ստացած վարկային և դրամաշնորհային ծրագրերի ցուցանիշները։ Նախորդ տարի Հայաստանը ԵՄ–ից ստացել է 8 մլրդ 875 մլն դրամի չափով դրամաշնորհ։ Սրանցից նպատակային դրամաշնորհ է եղել մոտ 2 մլրդ 980 մլն դրամը, իսկ ոչ նպատակային` 5 մլրդ 895 մլն դրամը։ Խոսելով ծախսերի մասին` նախարարը շեշտեց, որ արտաքին աջակցությամբ իրականացվող նպատակային ծրագրերի գծով կատարվող ծախսերն առանց համաֆինանսավորման կազմում են 57 մլրդ դրամ։

Ուշագրավ է, որ հեղափոխությունից հետո Նիկոլ Փաշինյանը փորձում էր հանրությանը համոզել, որ ԵՄ-ն կանգնած է ՀՀ նոր իշխանությունների կողքին և ուր-որ է հորդալու են եվրոպական ներդրումները:  Սակայն, ինչպես տեսնում ենք, այդ ներդրումները ոչ միայն չեն հորդացել, այլ ՀՀ իշխանություններին չի հաջողվել անգամ դրանք ստանալու նվազագույն պայմանները կատարել՝ եվրոպացի գործընկերներին ներկայացնել ֆինանսավորան ենթակա ռազմավարական ծրագրեր...