Երևանը՝ ռուսաստանցիների ամառային ճանապարհորդությունների լավագույն երթուղիների եռյակում․ ՏԱՍՍ

Ֆլորենցիան և Մեխիկոն 2023 թվականի ամառվա լավագույն արտասահմանյան ուղղությունների թվում են ռուսաստանցիների շրջանում, ընդ որում՝ Ստամբուլը, Մինսկը և Երևանը համարվում են ամենահայտնի հանգստի վայրերը: Այս մասին հայտնում է ՏԱՍՍ–ը՝ «Սբերսպասիբո»-ին հղումով։

«Հյուրանոցների ամրագրման լավագույն քաղաքներն են Ստամբուլը, Մինսկը, Երևանը, Բաքուն և Դուբայը: Այս քաղաքները կազմում են բոլոր ամրագրումների մոտ 40%-ը: Առաջին անգամ Մեխիկոն, Ֆլորենցիան և Բելեկը հայտնվել են կացարանների ամրագրման լավագույն 10 քաղաքներում: - ասում են փորձագետները։

Ըստ ուսումնասիրության՝ այս տարի ռուսաստանցիների շրջանում պահանջարկ ունեցող արտասահմանյան ուղղությունների ցանկն ընդլայնվել է։ Թեև Հայաստանն ու Թուրքիան մնում են առաջատարները դեպի այդ երկրներ գնված ավիատոմսերի առումով (կազմում է օտարերկրյա ամրագրումների 40,6%-ը), ճանապարհորդներն սկսել են ավելի հաճախ թռչել Թաիլանդ, Ինդոնեզիա, Ֆրանսիա, Ուզբեկստան և Կուբա: Միևնույն ժամանակ, ամառային արձակուրդների համար այս տարի 14%-ով ավելի քիչ են ընտրում Ադրբեջանը, ԱՄԷ-ն, Վրաստանը և Ղրղզստանը, քան 2022 թվականին։

Ամենատարածվածը դեռևս ճանապարհորդություններն են Ռուսաստանի տարածքում: Այս տարի, ինչպես և նախորդ տարի, «Սբերսպասիբո»-ի հաճախորդներն ամենից հաճախ գնում են ավիատոմսեր՝ դեպի Սոչի (20,6%) և Կալինինգրադ (7,3%)։ Լավագույն հնգյակում ընդգրկվել են նաև Միներալնիե Վոդին, Մախաչկալան և Սանկտ Պետերբուրգը։ Ընդ որում, ռուսները հիմնականում Մոսկվա և Սանկտ Պետերբուրգ են մեկնում գնացքով։