«Ընդդիմադիր» Արսեն Թորոսյանի ֆենոմենը (տեսանյութ)

Առողջապահության նախկին նախարար Արսեն Թորոսյանն այսօր բավական նյարդային կերպով է արձագանքել լրագրողներից մեկի այն ճշտող հարցին, թե ինչու է վերջինս ընդդիմադիր կեցվածք ընդունել իր իսկ թիմակիցների հանդեպ: Թորոսյանը նախ հարցրեց, թե ով է ընդդիմադիր կեցվածք ընդունել, ասես իրեն դա ընդհանրապես չէր բնորոշում, ապա վազեվազ հայտարեց, որ հարցեր հնչեցնելը դեռևս ընդդիմադիր կեցվածք չէ։

Գաղտնիք չէ, որ Թորոսյանի հարաբերությունները գործընկերների հետ իսկապես լարված են: Ըստ որոշ տեղեկությունների՝  ՔՊ-ականների մի խումբ Թորոսյանի հարցով անգամ դիմել է Փաշինյանին՝ ակնարկելով, որ նրա պահվածքն իր նկատմամբ դրսեւորած ներողամտության հետեւանք է։ Խոսքը քովիդի դեմ պայքարի հետ կապված վատնումների քրեական գործի մասին է, երբ նախարարն Արսեն Թորոսյանն էր։

Այդ գործով մի խումբ մեղադրյալներ են անցնում, մեծ թվով մարդիկ են հարցաքննվել, ու չնայած իրավապահները պարբերաբար սպառնում են, թե Թորոսյանին եւս կհարցաքննեն, բայց բանը դրան չի հասել։ Իսկ այդ ընթացքում Թորոսյանը գործնականում արդեն իսկ համալրել է ընդդիմադիրների շարքը, քանի որ այդպիսի սուր և անհարմար հարցեր ՔՊ-ականներին անգամ խորհրդարանական ընդդիմության ներկայացուցիչները չեն հնչեցնում: Սակայն, եթե ըստ Թորոսյանի՝ հարց հնչեցնելը ընդդիմադիր կեցվածք չէ, ապա հարց է առաջանում ՝ ինչու նա նախկինում աչքի չէր ընկնում հարցադրումների հանդեպ իր անթաքույց սիրով: Թե՛ ԱԺ նիստերի, թե՛ հանձնաժողովների նիստերի ընթացքում Թորոսյանը ձկան պես լուռ էր և նրա ակտիվացումն ու հարցադրումներն ուշագրավ կերպով համընկան հենց վերջին շրջանում հարուցված քրեական գործերի հետ...