ՔՊ-ական պատգամավորը չի ցանկանում վնասել Սամվել Ալեքսանյանի բիզնեսին

Այսօր ԱԺ-ում բավական բուռն քննարկվում էր հակածխախոտային օրենքը, որը լուրջ ռեզոնանս էր առաջացրել հանրության շրջանում: Սակայն, ուշագրավը այստեղ ոչ այնքան այդ քննարկումն էր, որքան պատգամավորներից մեկի՝ Նարեկ Ղահրամանյանի դիտարկումը, որ երբ իրենք ընդունում էին օրենք, որով արգելվում էր սահմանված չափանիշներին չհամապատասխանող պոլիէթիլենային տոպրակների օգտագործումը, ապա գիտեին, որ այդ օրենքը չի պահպանվելու: Ավելին, ըստ պատգամավորի՝ մի շարք խոշոր սուպերմարկետներ օրը ցերեկով խախտում են այդ օրենքը, մինչդեռ անուններ տալ պատգամավորը չցանկացավ, որպեսզի հակագովազդ չլինի։

Շատ էր խոսվում այն մասին, որ նշված օրենքը չի պահպանվում հատկապես Սամվել Ալեքսանյանին պատկանող սուպերմարկետների ցանցում: Ստացվում է՝ մի կողմից պատգամավորը հանցագործության մասին հաղորդում է ներկայացնում՝ հայտարարելով, որ իրենց իսկ գրած օրենքի վրա օլիգարխները, մեղմ ասած, աչք են փակում, մյուս կողմից՝ չի ցանկանում անուններ հնչեցնել, որպեսզի հակագովազդ չլինի: Ավելի տրամաբանական կլիներ հակառակը, որպեսզի օրինախախտի անունը հնչեցվեր, հանրությունն ու պատկան մարմիններն էլ իմանային, թե ովքեր են Հայաստանում աչք փակում օրենքի վրա: Սակայն, փոխարենը հենց պատգամավորն է աչք փակում Սամվել Ալեքսանյանի կողմից օրենքի խախտման դեպքերի վրա...