Փաշինյանն ու թիմակիցները ձախողեցին՝ Արցախի հարցից հետո կարևորությամբ երկրորդ խնդրի լուծումը

Հայաստանի ջրամբարներում այս տարի ջրի պաշարները քիչ են, ոռոգման նպատակով Սեւանից լրացուցիչ ջրառի կարիք կառաջանա։ Այս մասին Ազգային ժողովում 2022 թվականի պետական բյուջեի կատարողականի քննարկման ժամանակ ասաց ՏԿԵ փոխնախարար Վաչե Տերտերյանը։

Նա նշեց, որ Սեւանա լճից ոռոգման նպատակով նախորդ տարի լրացուցիչ ջրառի առավելագույն քանակը բաց չի թողնվել։ «2022 թվականին սահմանվել էր 170 մլն խմ, մենք Սեւանից բաց ենք թողել եւ օգտագործել ենք 165․1 մլն խմ-ն։ Դրա նախորդող տարին բաց էինք թողել 227 մլն խմ ջուր։ Ինչո՞ւ եմ ես սա հնչեցնում, որովհետեւ պարոն Սիմիդյանն ասաց, որ մենք այս տարի ջրամբարներում բավական քիչ ջուր ունենք կուտակված, հատկապես մեր խոշոր ջրամբարներում, մասնավորապես, Ախուրյանում, Ազատում, Ապարանում։ Եվ տարին դժվար է լինելու, մենք պետք է ամեն ինչ անենք, որ այլընտրանքային որոշակի քայլերով մեղմենք այդ ջրապահանջի պակասը, բայց, ըստ երևույթին, մենք Ազգային ժողովի հետ միասին ստիպված կլինենք քննարկել նաեւ Սեւանից լրացուցիչ ջրի քանակ բաց թողնելու խնդիրը։ Կրկնում եմ՝ ամեն ինչ կանենք՝ դրան չհասնելու համար, բայց իրատեսական իրավիճակն ու թվերը դրա մասին են խոսում։ Ես պատահական չնշեցի, որ նախանցած տարի մենք 227 մլն խմ լրացուցիչ ջուր ենք բաց թողել Սեւանից։ Բայց նախանցած տարի մենք ջրամբարներում 20-30 տոկոսով ավելի ջուր ենք ունեցել, քան ունենք այս տարի»,- ասել էր Տերտերյանը։

Հեղափոխությունից հետո Նիկոլ Փաշինյանը հայտարարել էր և նույնիսկ խոստացել էր, որ անելու է ամեն բան Սևանը փրկելու և Սևանից հավելյալ ջրառը կանխելու ուղղությամբ: Ավելին՝, նա հայտարարում էր, որ Սևանի հարցն իր համար Արցախի հարցի նման է և թերևս կարևորությամբ երկրորդն է։

Փաստորեն, ստացվում է, որ ապաշնորհ կառավարման արդյունքում հանգել ենք մի իրավիճակի, երբ Սևանից ռեկորդային չափի ջրառ պետք է իրականցվի, իսկ դա իր հերթին նշանակում է, որ Փաշինյանը սառույցին է գրել իր հերթական հավաստիացումն ու խոստումը: Վարչապետի խոսքերը, ինչպես երևում է, չունեն որևէ արժեք անգամ էկոլոգիական հիմնախնդիրների մասով հանրությանը տարատեսակ խոստումներ շռայլելիս: Մյուս կողմից էլ պետք է փաստենք, որ Արցախի հարցի լուծումը տապապելուց հետո Փաշինյանն ու թիմը տապալեցին նաև Արցախի հարցից հետո կարևորությամբ երկրորդ հարցի լուծումը...