Քաղաքապետարանի պաշտոնյաները «հարիֆացնում» են Տիգրան Ավինյանին (տեսանյութ)

Երևանի քաղաքապետարանի գործակարգավարական խորհրդակցության ժամանակ զեկուցվեց վարչական շրջանների փողոցների փոսանորոգումների աշխատանքի մասին։ Շինարարության և բարեկարգման վարչության պետի պաշտոնակատար Խորեն Գրիգորյանը նշեց, որ Էրեբունի-Նուբարաշեն  չափաբաժնի և Շեգավիթ-Աջափնյակ չափաբաժնի կապալառու կազմակերպության հետ պայմանագրի խզման են գնացել, ծավալների վերահաշվարկ են անում, հրատապ կկազմակերպեն նոր մրցույթ։ Մինչդեռ ընդամենը մեկ ամիս առաջ փոխքաղաքապետ Ավինյանին զեկուցվում էր, որ փոսալցման աշխատանքները մոտենում են ավարտին:

Վարչական շրջանների ղեկավարներին Ավինյանը հիշեցրեց, որ երկրորդային փողոցների փոսալցման աշխատանքներն իրենց պատասխանատվությունն է. «Ի՞նչ չունեք։ Ֆինանս չունենք։ Ուզում եմ հասկանալ՝ ինչ չունեք, ո՞րն է խնդիրը։ Ո՞վ կարող է պատասխանի այս հացին։ Երեք շաբաթ է հայերեն լեզվով ասում եմ փոսերը... Աջափնյակի մետրո պետք է կառուցենք։ Մի ամիս է փոս չենք կարողանում լցնել քաղաքում։ Հետո էլ կասենք՝ այս մեկը սենց, այն մեկը գնաց նկարեց, եսիմ ինչ։ Ամենապրիմիտիվ մեր աշխատանքը չենք կարողանում նորմալ կատարել»։

Այսինքն` քաղաքապետարանի պաշտոնյաներն Ավինյանին շուրջ մեկ ամիս է համոզում են, որ փոսալցման աշխատանքները չնչին են և արագ կշտկվեն, մյուս կողմից ակնհայտ է և երևանցիներին էլ անզեն աչքով հասկանալի ու տեսանելի է, որ դա, մեղմ ասած, այդպես չէ: Նույն խնդիրն է նաև գծանշման աշխատանքների հետ․ Ավինյանին զեկուցում են, որ այդ աշխատանքներն ավարտված են, այնուհետև պարզվում է, որ դա այդպես չէ: Հարց է առաջանում՝ եթե նա անգամ փոխքաղաքապետի պաշտոնում չի տիրապետում իրավիճակին և քաղաքապետարանի աշխատակիցները հաջողացնում են վերջինիս հրահանգների վրա աչք փակել և այդ հրահանգները կատարել ամիսներով, այն էլ կիսատ-պռատ, ի՞նչ է լինելու ապագայում...