Հեղափոխությունից հետո «տնավորված» պաշտոնյաների 10-յակը

Տարբեր լրատվամիջոցներ պարբերաբար հրապարակում են պաշտոնյաների հայտարարագրերը, որոնք տեղադրված են կոռուպցիայի կանխարգելման հանձնաժողովի կայքում։ Այդ հայտարարագրերում նկատելի է, որ ՔՊ-ական բազմաթիվ պատգամավորներ ու այլ պաշտոնյաներ նոր բնակարաններ են ձեռք բերել, բանկերում ունեն հսկայական ավանդներ, և, ընդհանրապես, իշխանափոխությունից հետո նրանց կյանքը բարելավվել է անասելի տեմպերով։ Ձեր ուշադրությանն ենք ներկայացնում հեղափոխությունից հետո նոր բնակարաններ ձեռք բերած պաշտոնյաների 10-յակը:

Դիցուք՝ պատգամավոր Քրիստինե Պողոսյանը 2020 թվականի վերջի դրությամբ ունեցել է 4 անշարժ գույք։ Դրանցից մեկը Հասարակական նշանակության շինություն է (Երևանի Կենտրոն վարչական շրջանում), մեկը հողամաս (Կոտայքի մարզի Պտղնի համայնքում), մյուս երկուսի տեսակի մասով առկա է հետևյալ բնութագիրը՝ Հայաստանի Հանրապետության օրենսդրության համաձայն նոր կառուցված, ձեռք բերված և անշարժ գույքի կադաստր վարող լիազոր մարմնի կողմից հաշվառված ու գնահատված այն շինությունները, որոնք դեռևս չեն ստացել իրավունքների պետական գրանցում, ինչպես նաև սեփականության կամ հողօգտագործման իրավունք ունեցող անձանց կողմից այդ հողամաuի վրա ինքնակամ կառուցված շենքերը և շինությունները, այդ թվում՝ բազմաբնակարան շենքերում կամ շենքերին կից ինքնակամ կառույցները: Վերջին երկու անշարժ գույքերից մեկը Վրաստանում է՝ Թբիլիսիում, մյուսը՝ Պտղնիում։ Բոլոր 4-ը գնվել են, սակայն նշված չէ, թե երբ։

ՀՀ Ազգային ժողովի պատգամավոր Արսեն Թորոսյանը, ով նախկինում եղել է նաև ՀՀ առողջապահության նախարար, ապա նաև ՀՀ վարչապետի աշխատակազմի ղեկավար, 2020 թվականից հետո գնել է 5 հողատարածք։ Առաջինը գնել է 2020-ին Կոտայքի մարզի Ծաղկաձոր քաղաքում, մյուս 4-ը՝ 2021-ի հոկտեմբեր-նոյեմբեր ամիսներին, երկուսը՝ Արագածոտնի մարզի Փարպի համայնքում, երկուսը՝ Կոտայքի մարզի Քարաշամբ համայնքում։ 

Ազգային ժողովի պատգամավոր Մաթևոս Ասատրյանն էլ բնակարան է գնել 72 հազար դոլարով Երևանի Աջափնյակ վարչական շրջանում։ 

ԿԸՀ նորաթուխ նախագահ Վահագն Հովակիմյանը  միանգամից 4 հողատարածք է նվեր ստացել, որոնիցից երկուսում կա հողին ամրակայված անշարժ գույք։ Հովակիմյանի հայտարարագրում ներկայացված 4 հողատարածքներն էլ գտնվում են Երևանի Աջափնյակ վարչական շրջանում։ 

Պատգամավոր Դավիթ Դանիելյանի ներկայացրած հայտարարագրերը` սկսած 2019 թվականի համար ներկայացրած տվյալներից` որպես ԿԳՄՍ նախարարի օգնական, բավական խառն են` լրացված տարբեր ժամանակահատվածներում, լի հայտնվող և անհետացող գույքով: Որպես հիմք ընդունելով պատգամավորի ներկայացրած հայտարարագրի` տարվա վերջում առկա անշարժ գույքը` արձանագրենք, որ Դավիթ Դանիելյանը համատեղ սեփականության կարգով ունի երեք բնակարան` բազմաբնակարան շենքում Երևանի Քանաքեռ-Զեյթուն թաղամասում, միանձնյա սեփականությամբ` Բյուրեղավանում և Նուռնուսում, ևս մեկ հողամաս Նուռնուսում` արդեն համատեղ սեփականությամբ։

Եթե մարզպետի պաշտոնը ստանձնելիս Տրդատ Սարգսյանն ուներ 2 անշարժ գույք, որոնցից մեկը բնակարան էր, իսկ մյուսը՝ ծառ, պատգամավորի պաշտոնը ստանձնելու օրվա դրությամբ Սարգսյանն արդեն ուներ 5 անշարժ գույք՝ 2017թ․–ին նվիրատվություն ստացած 1 հողամաս և 1 բնակարան, 2021 թվականին գնված 1 բնակարան, 1 ավտոկայանատեղի և 1 բազմաբմակարան շենքի ոչ բնակելի տարածք։

ԱԺ ՔՊ խմբակցության պատգամավոր Հովիկ Աղազարյանը, որ լրատվամիջոցների հետ զրույցում հայտարարել էր, որը վարձով է բնակվում, նոր բնակարան է ձեռք բերել «Անի» թաղամասում:

Գլխավոր դատախազությունն ուսումնասիրել է Հակակոռուպցիոն կոմիտեի նախագահ Սասուն Խաչատրյանի կողմից զգալի ցածր գնով բնակարան ձեռք բերելու առնչությամբ հրապարակումը, սակայն դրան ընթացք չի տվել:  «Ինֆոքոմ» կայքի հետաքննության համաձայն, Հակակոռուպցիոն կոմիտեի նախագահ Սասուն Խաչատրյանը 2021-ի փետրվարին ընդարձակ բնակարան է ձեռք բերել Երևանի կենտրոնում կառուցվող «Բյուրեղ» բնակելի թաղամասում՝ իր հարևանների համեմատությամբ էականորեն ավելի ցածր գնով։ Հետաքննության հեղինակ Մկրտիչ Կարապետյանն ավելի վաղ «Ազատության» հետ զրույցում հայտարարել էր, որ այս գործարքում առնվազն կոռուպցիոն ռիսկ է կա, որ, ըստ նրա, պետք է ուսումնասիրեն իրավապահները։

 Ազգային Ժողովի «Քաղաքացիական պայմանագիր» խմբակցության պատգամավոր Լենա Նազարյանը 2022 թվականին ձեռք է բերել 24 մլն արժողությամբ նոր բնակարան՝ Կոտայքի մարզի Ծաղկաձոր քաղաքում: Գնումը կատարվել է Ալվինա հյուրանոցային համալիր ՓԲԸ-ից՝ համատեղ սեփականությամբ։ Լենա Նազարյանը 2017 թվականին ևս հայտարարագրել է բնակարան համատեղ սոփականությամբ ամուսնու՝ Նարեկ Բաբայանի հետ, որը գտնվում է Կոտայքի մարզի Առինջ գյուղում։ Մեկ բնակարան էլ հայտարարագրված է Երևանում՝ Նորք Մարաշում: Ընդհանուր առմամբ Լենա Նազարյանն ունի հայտարարագրված 3 բնակարան:

ՀՀ ԱԺ «Քաղաքացիական պայմանագիր» խմբակցության պատգամավոր Գևորգ Պապոյանը եւ ոչ միայն նա՝ մի խումբ ՔՊ-ականներ, բնակարան են ձեռք բերել «Նոյ Ինվեստ Գրուպ» բնակելի թաղամասում, այս մասին տեղեկանում ենք կոռուպցիայի կանխարգելման հանձնաժողովի կայքից: Պապոյանը 21.017.400 ՀՀ դրամով ձեռք է բերել բնակարան` Ջերմուկ գրուպի սեփականատեր Աշոտ Արսենյանից, ով դարձել է իշխանությունների սրտի գործարարներից եւ ում որդին Ջերմուկի քաղաքապետն է այսօր:  Պապոյանը բնակարանը ձեռք է բերել 2022 թվականին: «Նոյ Ինվեստ Գրուպ» բնակելի թաղամասում 1 քառակուսի մետրի արժեքը սկսվում է 540. 000 ՀՀ դրամից: