Ովքեր են սրբագրում Նիկոլ Փաշինյանի ռեզոնանսային «մտքի գոհարները»

Որքան ավելի հաճախ է Նիկոլ Փաշինյանը ԱԺ ամբիոնից և իր այլ հրապարակային ելույթների ընթացքում արտահայտում մեղմ ասած՝ ռեզոնանսային մտքեր, այնքան ավելի է բարդանում ՔՊ-ական նրա թիմակիցների գործը, քանի որ վերջիններս ստիպված են լինում տարբեր հնարքներով և կռուտիտներով խմբագրել և սրբագրել իրենց քաղաքական ղեկավարի մտքի գոհարները:

Այսպես օրինակ՝ բոլորիս հիշողության մեջ թարմ է այն դեպքը, երբ Լենա Նազարյանը, մեկնաբանելով Փաշինյանի՝ բոլորին կշինեմ արտահայտությունը, հայտարարեց, որ Փաշինյանը նկատի ուներ ճանապարհաշինարարությունը:

Պատգամավոր Բաբկեն Թունյանը հայտարարում է, որ Փաշինյանը ընդամենը կարծիք է հայտնել, երբ հայտարարել է, որ Հայաստանի զինանշանը ՀՀ–ի հետ ոչ մի ընդհանուր բան չունի, հիմի վերջին տողերն էլ ընդհանրապես պետք է փոխել:

Վերջերս տեղեկություն տարածվեց, որ Փաշինյանը այն աստիճան չի վստահում սեփական թիմակիցներին, որ վերջիններիս հետ հանդիպելուց առաջ ստիպում է նրանց հանձնել հեռախոսները և խելացի ժամացույցները: Բնականաբար, ՔՊ-ականները պետք է այդ ամենին որևէ հոդաբաշխտ բացատրություն գտնեին և ահա թե ինչ է պնդում Հովիկ Աղազարյանը: Նա հայտարարել է, որ ԱԺ պատգամավորներից հեռախոսները հավաքելու պատճառն այն է, որ «նրանք չշեղվեն, կենտրոնանան նիստում քննարկվող հարցերին եւ «Տիկ-Տոկ» չմտնեն»:

Նիկոլ Փաշինյանը շաբաթներ առաջ ԱԺ ամբիոնից հերթական անհասկանալի հայտարարությունն արեց՝ ասելով, թե մենք 30 տարի ապրում ենք մի երկրում, որը կադաստրի վկայականը չունի. ՔՊ-ական պատգամավորները, սակայն, խուսափեցին մեկնաբանել վարչապետի հայտարարությունները, հավանաբար, իրենք էլ պատասխան չունեին: Մասնավորապես, հրաժարվողների մեջ էր Արեն Մկրտչյանը:

ՔՊ-ական Նարեկ Ղահրամանյանը Գորիս-Կապան ճանապարհը փակվելուց անմիջապես հետո փորձեց արդարացներ Փաշինյանի քաղաքականության հերթական ձախողումը և հայտարարեց, որ ճանապարհը մինչև երեկո բաց կլինի: Դա, իհարկե, տեղի չունեցավ:

Ազգային ժողովում տեղի ունեցած խորհրդարանական ճեպազրույցների ընթացքում քննարկման առարկա դարձավ ՀՀ վարչապետ Նիկոլ Փաշինյանի՝ Կառավարության հետ հարցուպատասխանի ընթացքում դրսևորած վարքագիծը։ Լրագրողը իշխող խմբակցությանը հիշեցրեց, որ 6 տարի առաջ նույն Փաշինյանը նկատողություն էր անում Գևորգ Կոստանյանին՝ ընդդիմադիրների վրա մատ թափ տալու համար, իսկ այսօր ինքն է այդպես խոսում։ «Ի՞նչ է փոխվել այս տարիների ընթացքում»,– հարցրեց լրագրողը։ «ՔՊ» խմբակցության պատգամավոր Վահագն Ալեքսանյանը նշեց, որ ամբիոնից ժեստիկուլյացիան կարող է լինել ցանկացած և վերոգրյալի վիրավորական ընկալումը արդեն ամեն մեկի որոշելիքն է և այդ համատեքստում Էդուարդ Աղաջանյանը երկրորդեց իր գործընկերոջը՝ նշելով, որ լրագրողները շեշտադրումը անում են ձևին և ոչ թե բովանդակությանը:

ՔՊ-ական պատգամավորներն արձագանքել էին նաև Փաշինյանի շարասյան կողմից սարսափելի վթարին։ Արդարացում փնտրողների մեջ էր նաև Մարիա Կարապետյանը։