Մասկը հայտնել է՝ ով ում վրա առաջինը կտեղադրվի Neuralink չիպը

Միլիարդատեր Իլոն Մասկը հաստատել է, որ իր Neuralink ուղեղի չիպերի ստարտափն այս տարի կսկսի իր առաջին փորձարկումները մարդկանց վրա, գրում են միջազգային ԶԼՄ-ները:

Փարիզում կայացած VivaTech միջոցառման ժամանակ իր ելույթում Իլոն Մասկը ասել է, որ Neuralink-ը նախատեսում է չիպը ներդնել տետրապլեգիայով կամ ստորին վերջույթների կաթվածով առաջին հիվանդի վրա։

Անցյալ ամիս Neuralink-ը հայտնեց, որ ստացել է ԱՄՆ Սննդամթերքի և դեղերի վարչության թույլտվությունը մարդկային առաջին կլինիկական փորձարկման համար: Միևնույն ժամանակ, ընկերությանն ԱՄՆ-ում հետաքննություններ են սպասվում կենդանիների վրա կատարված փորձերի վերաբերյալ: Ըստ Reuters-ի՝ գործակալությունը թույլ է տվել Neuralink-ին օգտագործել իր ուղեղի իմպլանտը և վիրաբուժական ռոբոտը, սակայն հրաժարվել է ավելի շատ մանրամասներ տրամադրել:

Ինչպես հայտնում է Reuters-ը՝ վկայակոչելով փորձագետներին, եթե Neuralink-ը կարողանա ապացուցել, որ իր սարքն անվտանգ է մարդկանց համար, դեռևս մի քանի տարի կպահանջվի, մինչև ստարտափը կոմերցիոն օգտագործման թույլտվություն ստանա։ Ընկերությունը մրցում է նաև նեյրոտեխնոլոգիական այլ ընկերությունների հետ, որոնք արդեն իրենց սարքերը տեղադրել են մարդկանց մեջ:

2019 թվականից Մասկը առնվազն չորս անգամ խոստացել է, որ Neuralink-ը շուտով կսկսի մարդկանց վրա փորձարկումները։