Ինչ «սև կատու» է անցել Գյումրիի ՔՊ-ական փոխքաղաքապետերի միջև

Ընդամենը մի քանի ամիս Գյումրիում փոխքաղաքապետեր նշանակվեցին, ովքեր ներկայացնում էին իշխող կուսակցությունը: Բնականաբար, բոլորի համար էլ հասկանալի էր, որ այսպես ասած` կոալիցիոն կառավարման արդյունքում քաղաքի դե-ֆակտո ղեկավարումը իրականացնելու է ոչ թե առավել շատ քանակով ձայներ հավաքած Բալասանյան դաշինքի ներկայացուցիչ քաղաքապետը, այլ հենց ՔՊ-ական քաղաքապետերը: Սակայն, վերջին շաբաթներին համառ լուրեր են պտտվում, որ Գյումրիի ՔՊ-ական երկու փոխքաղաքապետերի՝ վարչապետի կնոջ՝ Աննա Հակոբյանի մորաքրոջ թոռ Վահագն Մկրտչյանի եւ պաշտպանության նախարար Սուրեն Պապիկյանի հորեղբոր որդու՝ Արթուր Պապիկյանի հարաբերությունները լարվել են։ Լրատվամիջոցների փոխանցմամբ՝ մեկը մյուսին մեղադրում է ինքնագործունեության մեջ։ Վերջերս նույնիսկ մեծ վիճաբանություն է եղել նրանց միջեւ, որն ավարտվել է Վահագն Մկրտչյանի օգնականի՝ աշխատանքից ազատմամբ։ Վերջինս մտերիմ էր փոխքաղաքապետի հետ։

Մկրտչյանի օգնականը անգործ չի մնա, նրան այլ բաժին կտեղափոխեն։ Վահագն Մկրտչյանի օգնականին կտեղավորեն քաղաքապետարնի քաղաքաշինության և ճարտարապետության բաժին՝ որպես բաժնի պետ, իսկ Վահագն Մկրտչյանի օգնականի պաշտոնում շրջանառվում է տեղեկություն, որ այդ պաշտոնում կլինի իր աներորդին՝ Գևորգ Յայլոյանը, ով Շիրակի մարզպետի աշխատակազմում մի որոշ ժամանակ աշխատել է։

Փոխքաղաքապետերի միջև լարվածության ևս մեկ պատճառ կարող է լինել այն հանգամանքը, որ Նիկոլ Փաշինյանը որոշել է զբաղվել Գյումրիով և ամբողջական իշխանություն վերցնել այնտեղ։ Հիշեցնենք, որ այս պահին գործում է կոալիցիա ՔՊ-ի և «Բալասանյան» դաշինքի միջև, ու իշխանությունը փաստացի «Քաղաքացիական պայմանագրի» ձեռքում չէ։ Ըստ ամենայնի, Գյումրիում ՔՊ-ի մարդը լինելու է Աննա Հակոբյանի ազգական, փոխքաղաքապետ Վահագն Մկրտչյանը, և կամաց-կամաց ամբողջ քաղաքային իշխանությունը փոխանցվելու է նրան. արտահերթ կամ հերթական ընտրություններով նա է դառնալու քաղաքապետ։ Մկրտչյանի հանդեպ տածած հատուկ վերաբերմունքի դրսևորումներից մեկն այն է, որ Նիկոլ Փաշինյանը երկրորդ անգամ է մասնակցում այս երիտասարդի ընտանեկան միջոցառմանը, և այն լուսաբանվում է սոցցանցերում։ Բնականաբար, այս հանգամանքը չի կարող դուր գալ Արթուր Պապիկյանին, քանի որ վերջինս փաստացի մնալու է «լուսանցքում»...