ՀՀ ԱԺ նախագահը բարձր գնահատեց Իրանի նախագահի և ժողովրդի ավանդական ջերմ վերաբերմունքը հայ համայնքի ներկայացուցիչների նկատմամբ

Դեկտեմբերի 23-ին ՀՀ ԱԺ նախագահ Սամվել Նիկոյանը Ազգային ժողովում հանդիպեց պաշտոնական այցով Հայաստանի Հանրապետություն ժամանած Իրանի Իսլամական Հանրապետության նախագահ Մահմուդ Ահմադինեժադի եւ նրա գլխավորած պատվիրակության հետ: Հանդիպմանը ներկա էին ԱԺ փոխնախագահ Սամվել Բալասանյանը, մշտական հանձնաժողովների նախագահներ, ԱԺ խմբակցությունների ներկայացուցիչներ:

Ողջունելով ԻԻՀ նախագահի եւ նրա ղեկավարած պատվիրակությանը՝ ԱԺ նախագահ Սամվել Նիկոյանը նշեց, որ Հայաստանի անկախության 20 տարիներից ի վեր Իրանի հետ բարեկամական հարաբերությունները մշտապես գտնվել են զարգացման մեջ: Երկու երկրների միջեւ իրագործվել են մի շարք արդյունավետ ծրագրեր: ՀՀ ԱԺ նախագահի խոսքերով, ակնկալվում է, որ այն ծրագրերը, որոնք նախատեսված են, նույնպես հաջողությամբ կիրագործվեն: Տնտեսական հարաբերությունների հետագա զարգացման տեսանկյունից կարեւորվեց էներգետիկայի եւ տրանսպորտի բնագավառներում նախագծերի իրականացումը:

Շնորհակալություն հայտնելով ջերմ ընդունելության համար՝ ԻԻՀ նախագահը նույնպես կարեւորեց Հայաստանի եւԻրանի միջեւ առկա հարաբերություններն ու համագործակցությունը՝ համոզմունք հայտնելով, որ ՀՀ ԱԺ նախագահն ու պատգամավորները կաջակցեն նախատեսված ծրագրերի իրականացմանը:

ՀՀ ԱԺ նախագահ Սամվել Նիկոյանը նշեց, որ ստորագրված է միջխորհրդարանական համագործակցության հուշագիր, տեղի են ունեցել խորհրդարանների նախագահների փոխայցելություններ եւ հանդիպումներ: Նա պատրաստակամություն հայտնեց շարունակել այդ հանդիպումներն ու զարգացնել համագործակցությունը: ԱԺ նախագահը բարձր գնահատեց ՀՀ Ազգային ժողովի Հայաստան-Իրան եւ ԻԻՀ Մեջլիսի Իրան-Հայաստան բարեկամության պատգամավորական խմբերի գործունեությունը, որոնց փոխայցելություններն աշխուժություն եւ նոր լիցք են հաղորդում ոչ միայն միջխորհրդարանական կապերին, այլեւ միջպետական հարաբերություններին եւ հնարավորություն են տալիս ավելի լավ ճանաչել իրար եւ ծանոթանալ միմյանց տեսակետներին: Սամվել Նիկոյանը նշեց, որ տարիներ առաջ պատգամավորական բարեկամության խմբի կազմում այցելել է ԻԻՀ եւ տպավորիչ հիշողություններ ունի ցուցաբերված ջերմ ընդունելությունից:

ԻԻՀ նախագահն անհրաժեշտ համարեց միջխորհրդարանական կապերի ակտիվացումը:

Երկուստեք կարեւորվեց համագործակցությունը միջազգային կառույցներում:

ՀՀ ԱԺ նախագահը բարձր գնահատեց նախագահ Մահմուդ Ահմադինեժադի եւ Իրանի ժողովրդի ավանդական ջերմ վերաբերմունքը հայ համայնքի ներկայացուցիչների նկատմամբ եւ նշեց, որ նրանք բարեկամության կամուրջ են երկու երկրների եւ ժողովուրդների միջեւ:

Հանդիպման վերջում Իրանի նախագահը գրառում կատարեց ԱԺ պատվավոր հյուրերի գրքում: