«Անասնաբուժության մասին» օրենքում փոփոխություններ կատարելու մասին նախագիծը հունիսի 7-ին, ԱԺ տարածքային կառավարման, գյուղատնտեսության ու շրջակա միջավայրի հարցերի մշտական հանձնաժողովի նիստին ներկայացրեց Տեսչական մարմինների աշխատանքների համակարգման գրասենյակի ղեկավարի պարտականությունները կատարող Արմեն Դանիելյանը: «Առաջարկվող օրենսդրական փոփոխություններով նախ առաջարկվում է հստակեցնել սննդի շղթայի այն փուլերը ու գործողությունները, որոնց ընթացքում ֆիզիկական ու իրավաբանական անձինք պարտավոր են ապահովել սպանդանոցային ծագման, կենդանական ծագման մթերքի պարտադիր լինելու պահանջը։ Նախատեսվում է սահմանել, որ ոչ սպանդանոցային մորթի արդյունքում կենդանական մթերքը առգրավվում է ու կասեցվում է իրացումը։ Տեսչական մարմնի կողմից առգրավվածը նաև ոչնչացվելու է։ Իսկ ոչնչացման կարգը սահմանելու է կառավարությունը»,- ասել էրԴանիելյանը։
Սա, անշուշտ, մեծ հարված է գյուղացիներին և մեծ օգուտ ու նվեր՝ սպանդանոցների տերերին, ովքեր բնավ էլ պատահական մարդիկ չեն:
Լոռու մարզի Օձուն համայնքում գործում է անհատ ձեռնարկատեր Խասիկ Տիտանյանին պատկանող սպանդանոցը։ Դարպաս համայնքում է գործում «Միտք-Կ» ընկերության սպանդանոցը:
Վայոց ձորում գործող միակ սպանդանոցը շահագործում է «Վայոց ձոր մսամթերք» ՍՊԸ-ն։ Ընկերության տնօրենը Եղեգնաձորի նախկին քաղաքապետ, ՀՀԿ-ական Սիրեկան Բաբայանն է:
Բալահովիտում սպանդանոց ունի «Օջախ» ՍՊԸ-ն, այն իրականացնում է խոզերի մորթ։ Ընկերության սեփականատերը Կիմ Եգանյանն է, ով Միգրացիոն պետական ծառայության նախկին ղեկավար Գագիկ Եգանյանի ազգականն է։ Կիմ Եգանյանը Երևանում ու Բալահովիտում գործող «Օջախ» ռեստորանների սեփականատերն է։
Տավուշի մարզում գործում է երկու սպանդանոց. դրանցից մեկը պատկանում է անհատ ձեռնարկատեր Արմեն Ամիրաղյանին ու գտնվում է Նոյեմբերյանում, իսկ Դիլիջանում սպանդանոց է շահագործում «Հայր և որդի Երեմյաններ» ՍՊԸ-ն։ Ընկերության մասնակիցը գործարար Դավիթ Երեմյանն է, ով զբաղվում է ռեստորանային բիզնեսով, նրան է պատկանում «Երևան պանդոկ» ռեստորանների ցանցը, «Լավաշ», «Շերեփ», «Լիվինգսթոն» ռեստորանները։
«Սիմիրամ» ՍՊԸ-ն Երևանում զբաղվում է ճագարաբուծությամբ, ճագարների մորթով։ Ընկերությունը հիմնադրվել է 2012-ին, միանձնյա բաժնետերը Տիգրան Ղարիբյանն է։ Նա «Շանթ» ընկերության սեփականատերերից Մանվել Ղարիբյանի որդին է։
Ըստ մամուլի բազմաթիվ հրապարակումների՝ սպանդանոցներ ունի նաև ՀՀԿ-ական նախկին պատգամավոր Սամվել Ալեքսանյանը:
Այսպիսով, կառավարությունը պարարտ հող է ստեղծում վերը նշված և մյուս անձանց հարստանալու համար, մինչդեռ հեղափոխության օրերին հնչող խոստումները այլ էին՝ գյուղացիների վարկերի ջրում, գյուղացիների բերքի իրացման համար նպաստավոր պայմանների ստեղծում և այլն:
ՈՒՂԻՂ ԵԹԵՐ
Ամենադիտված 
Սպանություն է տեղի ունեցել Երևանում
