Google ընկերության բրաուզերից օգտվում է ավելի քան 200 մլն մարդ

2010 թվականի դեկտեմբերին Google ընկերության բրաուզերից նախընտրել են օգտվել համացանցից օգտվելու հնարավորություն ունեցող մոտ 120 միլիոն մարդ: Chrome բրաուզերից օգտվողների այս վիճակագրությունը ներկայացրել է Google ընկերության գլխավոր տնօրեն Լարի Փեյջը:

Փեյջը հայտարարել է, որ 2011 թվականի մայիսին այդ ցուցանիշը հասել է 160 միլիոնի, իսկ այսօր Chrome բրաուզերով աշխատում է մոտ 200 միլիոն օգտատեր:

Net Applications գնահատականով' սեպտեմբերին Chrome-ը զբաղեցնում էր բրաուզերների համաշխարհային շուկայի 16,2%-ը: 2012 թվականին այն կարող է գրավել շուկայի 20%-ը:

Նշենք, որ համաշխարհային մասշտաբով' Chrome-ը զիջում է միայն Internet Explorer և Firefox բրաուզերներին, որոնց մասնաբաժինը կազմում է համապատասխանաբար՝ 54,4 և 22,5%:

Սակայն այլ է պատկերը հայկական ինտերնետային շուկայում։ Ըստ Circle.am և Բիզնես 24 նախագծերի համատեղ պատրաստած «ԻՆՏԵՐՆԵՏԸ ՀԱՅԱՍՏԱՆՈՒՄ - ԳԱՐՈՒՆ 2011» զեկույցի Google Chrome–ը Հայաստանում վստահորեն զբաղեցնում է առաջին հորիզոնականը և գնալով էլ ավելի ամրապնդում իր դիրքերը։

Ստորև ներկայացնում ենք Հայաստանում բրաուզերների օգտագործման աղյուսակն ըստ վերոնշյալ զեկույցի.

1. Chrome - 47.9%,

2. Firefox - 30.0%,

3. Internet Explorer - 12.5%,

4. Opera - 8.9%,

5. Safari - 0.4%

և այլ բրաուզերներ - 0.30%: