Եվրոպան նոր զենք է ստեղծում

Հրթիռային համակարգերի միջազգային արտադրող MBDA-ն նախնական համաձայնության է եկել Գերմանիայի, Ֆրանսիայի, Իտալիայի և Նիդեռլանդների իշխանությունների հետ, որ առաջիկա երեք տարվա ընթացքում կստեղծվի հիպերձայնային զենքի դեմ պաշտպանական համակարգի նախատիպ։ Այս մասին հայտնում է բրիտանական The Daily Telegraph թերթը՝ հղում անելով ընկերության գործադիր տնօրեն Էրիկ Բերանգերին։

Նրա խոսքով՝ այս նախագիծը «կնպաստի Եվրոպայում ինքնիշխան հրթիռային համակարգերի արդյունաբերության ամրապնդմանը», ինչպես նաև կբարձրացնի եվրոպական արդյունաբերության մրցունակությունը։

Բերանգերը նաև ուշադրություն է հրավիրել այն փաստի վրա, որ հիպերձայնի ոլորտում տեխնոլոգիաները զարգանում են։

«MBDA-ն ցանկանում է մնալ նորարարության առաջնագծում և առաջնորդել Եվրոպան դեպի հիպերձայնային սպառնալիքները զսպելու ամենաարդյունավետ լուծումը», - ավելացրել է նա:

ԱՄՆ բանակի քարտուղար Քրիստին Ուորմութն ավելի վաղ ասել էր, որ Միացյալ Նահանգների բանակը մտադիր է հիպերձայնային հրթիռներ տեղակայել 2023 թվականին՝ չնայած վերջին շրջանում այդ տեսակի զենքի փորձարկումների չեղարկմանը։

Մինչ այս ԱՄՆ Զինված ուժերի ռազմավարական հրամանատարության ղեկավար, ռազմաօդային ուժերի գեներալ Էնթոնի Քոթոնը հայտարարել էր, որ հիպերձայնային զենքի առկայությունը կարելի է դիտարկել՝ որպես միջուկային զսպման ասպեկտներից մեկը։