Թուրքական լրատվամիջոցները հրաժարվել են աշխատել Reuters-ի հետ Էրդողանի որդու մասին հոդվածից հետո

Թուրքական Albayrak Medya և TürkMedya մեդիա հոլդինգները խզել են պայմանագիրը Reuters լրատվական գործակալության հետ։ Այս քայլը հաջորդել է գործակալության կողմից հոդվածի հրապարակմանը, որտեղ ասվում է, որ ամերիկյան Dignita ընկերության շվեդական դուստր ձեռնարկությունը փորձել է կաշառել Թուրքիայի նախագահ Ռեջեփ Թայիփ Էրդողանի որդուն՝ Նեջմեդդին Բիլալ Էրդողանին։

«Մեր պայմանագիրը Reuters գործակալության հետ խզվել է»,- երեքշաբթի՝ հունիսի 27-ին, Twitter-ի իր էջում հայտնել է TürkMedya-ն։ Նմանատիպ հայտարարություն է տեղադրվել Albayrak Medya-ի Twitter-ի էջում։

Մեդիահոլդինգներն իրենց հայտարարություններում չեն պարզաբանել լրատվական գործակալության հետ աշխատելուց հրաժարվելու պատճառը, սակայն թուրքական շատ լրատվամիջոցներ որոշել են, որ պատճառը Էրդողանի որդու մասին հիշատակված նյութն է։

Թուրքիայի նախագահի աշխատակազմի հաղորդակցության բաժնի ղեկավար Ֆահրեթթին Ալթունն իր հերթին հայտարարել է, թե Reuters-ը անարգում է լրագրության էթիկական սկզբունքները՝ չստուգված տեղեկություններ ներկայացնելով Թուրքիայի նախագահ Ռեջեփ Թայիփ Էրդողանի և նրա որդու՝ Բիլալի դեմ։

«Այս հոդվածը միաժամանակ և՛ սև կետ է լրագրության պատմության մեջ, և՛ խղճուկ օրինակ, թե ինչպես է 171-ամյա մեդիա կազմակերպությունը բացահայտորեն իրեն նվաստացնում», - գրել է Ալթունը Twitter-ում։

Երկուշաբթի՝ հունիսի 26-ին, հրապարակվել է Բիլալ Էրդողանի մասին Reuters-ի հոդվածը։ Ըստ նյութի՝ ԱՄՆ-ի և Շվեդիայի հակակոռուպցիոն իշխանությունները քննարկում են բողոքը, որում ասվում է, որ ամերիկյան Dignita ընկերության շվեդական դուստր ձեռնարկությունը խոստացել է տասնյակ միլիոնավոր դոլարներ վճարել Էրդողանի որդուն՝ ընկերությանը Թուրքիայում մենաշնորհային դիրք երաշխավորելու համար։ Բիլալ Էրդողանը հերքել է այս մեղադրանքները։