Ֆրանսիայի կողմից օրենքն ընդունելը շահերի համընկնման հետևանք է

Այսօր՝ լրագրողների հետ հանդիպմանը, թուրքագետներ Անուշ Հովհաննիսյանը և Արտակ Շաքարյանը համաձայնեցին այն տեսակետի շուրջ, որ Ֆրանսիայի այս օրինագիծը պարզապես շահերի համընկնման հետևանք էր։ «Բնականաբար Հայոց ցեղասպանության ճանաչման համար սա որակական նոր փուլ է։ Սա հատուկ հայկական հաղթանակ չէր, քանի որ Ֆրանսիայի և հայերի շահերն այս պահին համընկան», – նշեց Ա. Շաքարյանը՝ մանրամասնելով, որ Ֆրանսիան հայտնի է իբրև Եվրամիություն Թուրքիայի մուտքը խոչընդոտող երկիր, ինչը պայմանավորված է հակաթուրքական ալիքի հասունացմամբ։

Անուշ Հովհաննիսյանը համաձայնեց այս տեսակետի հետ։ Ավելին՝ նա կարծում է, որ այս օրենքը Թուրքիայի հայկական քաղաքականության «կրախ»-ն է, որը ցույց տվեց Թուրքիայի այն համոզման չհիմնավորվածությունը, որ Հայկական հարցը կարելի է փակված համարել։ 

Բանախոսները կարևորեցին նաև օրենքի այն նրբությունը, որին հաճախ չեն անդրադառնում։ Այս օրինագիծը պատիժ նախատեսում է միայն Հայոց ցեղասպանությունը նվաստացնող արտահայտություններով հանդես եկող անձի համար. ժխտողը կենթարկվի օրենքով սահմանված ազատազրկման կամ 45.000 եվրո տուգանքի։ Իսկ գիտական մակարդակով քննարկման դնող գիտնականները չեն ենթարկվի պատասխանատվության։