Ուկրաինայում խաղաղություն հաստատելու ժամանակն է. Թրամփ

Եկել է ժամանակը, որ ԱՄՆ-ն սկսի նպաստել ուկրաինական հակամարտության խաղաղ կարգավորմանը և հանդես գալ` որպես միջնորդ Կիևի և Մոսկվայի միջև։ Այս մասին Reuters-ին տված հարցազրույցում ասել է ԱՄՆ նախկին նախագահ Դոնալդ Թրամփը։

«Կարծում եմ, որ ամենակարևորը, որ պետք է անի ԱՄՆ-ն այս պահին, խաղաղություն հաստատելն է, Ռուսաստանին և Ուկրաինային միավորել՝ խաղաղությունապահովելու համար: Հիմա ժամանակն է դա անելու, երկու կողմերին միասին բերելու խաղաղության»,- ասել է Թրամփը։

Նա նաև մեկնաբանել է Միջազգային քրեական դատարանի կողմից ՌԴ նախագահ Վլադիմիր Պուտինի կալանավորման հրամանը։ Նրա խոսքով, այս հարցը պետք է քննարկվի հակամարտության ավարտից հետո, «որովհետև հենց հիմա, եթե բարձրացնեն այս թեման, երբեք խաղաղություն չի հաստատվի, երբեք կարգավորման չեն հասնի»։

ԱՄՆ նախկին նախագահ Դոնալդ Թրամփը բազմիցս հայտարարել է, որ Ուկրաինայի հակամարտությունը լուծելը «դժվար չի լինի», եթե ինքը վերընտրվի պետության ղեկավարի պաշտոնում։ Թրամփը հայտարարել է, որ իր հաղթանակի դեպքում ուղղակի բանակցություններ կկազմակերպի Մոսկվայի և Կիևի միջև և 24 ժամում կդադարեցնի Ուկրաինայում հակամարտությունը։