Պետություն-մասնավոր երկխոսության անհրաժեշտություն կա․ ՏԿԵ նախարարը՝ ԻննոԻջևան հանգույցի բացմանը

ՀՀ տարածքային կառավարման և ենթակառուցվածքների նախարար Գնել Սանոսյանը հունիսի 30-ին Իջևան քաղաքում մասնակցել է «ԻննոԻջևան» նորարարական հանգույցի բացման արարողությանը։

ՏԿԵՆ հաղորդմամբ՝ նույն միջոցառման շրջանակներում նախարարը մասնակցել է նաև «Պետություն - մասնավոր երկխոսություն/Տավուշի մարզի տնտեսական արդիականացման հնարավորություններ և առկա խնդիրներ» խորագրով պանելային քննարկմանը, որին ներկա էին նաև ՀՀ էկոնոմիկայի նախարար Վահան Քերոբյանը, ԱԺ պատգամավոր Հովիկ Աղազարյանը, Տավուշի մարզպետ Հայկ Ղալումյանը, համայնքապետեր և այլ հյուրեր։

Պանելային քննարկման հիմնական նպատակն էր պետական և մասնավոր հատվածների միջև արդյունավետ երկխոսության միջոցով բացահայտել Տավուշի մարզի տնտեսական արդիականացման հեռանկարներն ու առկա խնդիրները, ինչպես նաև հանրայնացնել բիզնեսին ուղղված պետական աջակցության ծրագրի շրջանակն ու հնարավորությունները։

Նախարար Սանոսյանն իր խոսքում կարևորել է պետություն-մասնավոր արդյունավետ երկխոսության անհրաժեշտությունը, մասնավորի կողմից պետությունից ունեցած ակնկալիքների հստակ ձևակերպումը․ «Երբ մասնավորը կոնկերտացնում է, թե ինչ է ակնկալում պետական կառավարման համակարգից, ներկայացնում է կոնկրետ առաջարկներ, դրանք իրականության մեջ վերածվում են արդյունավետ համագործակցության, նպաստում են բիզնեսի շարունակականությանը և տալիս են պտուղներ»,-ընդգծել է Սանոսյանը։

Պանելային քննարկումից հետո հարցուպատասխանի ձևաչափով անդրադարձ է կատարվել մի շարք հարցերի, որից հետո նախարարը շրջայց է կատարել «ԻննոԻջևան» նորարարական հանգույցի Իրական դպրոց / Real School-ում, որտեղ իջևանցի երեխաները կրթություն են ստանում, արտադասարանային աշխատանոցներում իրականացնում են եռաչափ տպիչով տպագրություն, պատրաստում են բնական օճառներ, աշխատանք են տանում ուսումնական ԱԹՍ-ների հետ և այլն։