Պրիգոժինի խռովությունից հետո ձերբակալվել են գեներալ Սուրովիկինին և այլ բարձրաստիճան ռուս զինվորականների. WSJ

Առնվազն 13 ռուս բարձրաստիճան զինվորական է ձերբակալվել «Վագներ» մասնավոր ռազմական ընկերության հիմնադիր Եվգենի Պրիգոժինի խռովությունից հետո, հայտնում է The Wall Street Journal-ը՝ հղում անելով աղբյուրներին: ՌԴ ԱԴԾ-ն սկսել է ձերբակալությունները Պրիգոժինի խռովությունից մի քանի ժամ անց, ըստ հրատարակության զրուցակիցների։ Ձերբակալություններն արվում են «շարքերը մաքրելու» նպատակով, ասել է աղբյուրներից մեկը։ Հրատարակության տվյալներով՝ շուրջ 15 ռուս սպա արդեն  հեռացվել են ծառայությունից։

ՌԴ ԱԴԾ-ի կողմից ձերբակալվածների թվում է Ռուսաստանի Դաշնության օդատիեզերական ուժերի հրամանատար, Ուկրաինայում ռուսական զորքերի հրամանատարի տեղակալ, բանակի գեներալ Սերգեյ Սուրովիկինը, հայտնում են WSJ-ի աղբյուրները։ Զրուցակիցներից մեկը հայտարարել է, որ Սուրովիկինը իմացել է Պրիգոժինի պլանների մասին, սակայն չի մասնակցել խռովությանը։ Սուրովիկինին մեղադրանք չի առաջադրվել։ Աղբյուրները նշում են, որ գեներալը կարող է ազատ արձակվել, հենց որ ՌԴ նախագահ Վլադիմիր Պուտինը որոշի, թե ինչպես արձագանքել խռովության հետևանքներին: