Պրիգոժինը հրաժարվել է Պուտինի առաջարկից

«Վագներ» մասնավոր ռազմական ընկերության հիմնադիր Եվգենի Պրիգոժինը մերժել է ՌԴ նախագահ Վլադիմիր Պուտինի՝ ՊՄԿ հրամանատարներին Սեդոյի ղեկավարությամբ ծառայելու առաջարկը։ Այս մասին Պուտինը հայտարարել է «Կոմերսանտ»-ին տված հարցազրույցում։

Պուտինը նշել է, որ «վագներցիներին» աշխատանքի մի քանի տարբերակ է առաջարկել։ Այդ թվում՝ նրանք կարող էին հավաքվել մեկ տեղում և շարունակել ծառայությունը Սեդոյի գլխավորությամբ։ «Եվ նրանց համար ոչինչ չէր փոխվի։ Նրանց առաջնորդելու էր այն նույն մարդը, ով ողջ ընթացքում եղել է նրանց իրական հրամանատարը: Շատերը գլխով արեցին, երբ ես սա ասացի»,- ասել է Պուտինը։

Սակայն, ըստ նրա, Պրիգոժինը, ով նստած էր հրամանատարների առջև, դա չի տեսել։ Այն բանից հետո, երբ ՊՄԿ ղեկավարը լսել է ՌԴ ղեկավարին, նա ասել է, որ «տղերքը համաձայն չեն այդ որոշման հետ»։

Վլադիմիր Պուտինը մանրամասներ է հայտնել նաև ՊՄԿ-ի մարտիկների հետ հանդիպման մասին։ Հանդիպմանը 35 հոգի է եղել։ Հանդիպման ընթացքում ՌԴ ղեկավարը գնահատական ​​է տվել, թե ինչ են արել «Վագների» մարտիկները մարտի դաշտում և հունիսի 24-ի իրադարձությունների ժամանակ։

Հունիսի վերջին Ռուսաստանի Դաշնության նախագահը «Վագների» աշխատակիցներին առաջարկել է պայմանագիր կնքել ՌԴ ՊՆ-ի հետ՝ որպես ապստամբության ձախողումից հետո հետագա գործունեության հնարավոր տարբերակներից մեկը։