Եվրամիությունը դատապարտում է Ռուսաստանի որոշումը. Kommersant

Եվրամիությունը դատապարտում է հացահատիկի գործարքը դադարեցնելու Ռուսաստանի որոշումը, հայտարարել է Ռուսաստանում ԵՄ պատվիրակությունը։ Ըստ ԵՄ-ի՝ «Ռուսաստանը միանձնյա արգելափակում է Ուկրաինայից արտահանման կարևորագույն ուղիներից մեկը»։ Եվրոպան կարծում է, որ Մոսկվան «ամբողջական պատասխանատվություն է կրում ամբողջ աշխարհում հացահատիկի մատակարարման ընդհատումների և պարենային ապրանքների համաշխարհային գների աճի համար», գրում է Kommersant-ը։

Ըստ ԵՄ-ի՝ հացահատիկի գործարքն օգնեց ապահովել գրեթե 33 միլիոն տոննա հացահատիկի և պարենի անվտանգ արտահանումը 45 երկիր: «ԵՄ-ն կոչ է անում Ռուսաստանին վերանայել իր որոշումը և անհապաղ վերսկսել Սևծովյան հացահատիկի նախաձեռնության իրականացումը»,- ասվում է ԵՄ պատվիրակության հայտարարության մեջ։

Հացահատիկի գործարքը Ռուսաստանի, Ուկրաինայի, Թուրքիայի և ՄԱԿ-ի միջև կնքվել է 2022 թվականի ամռանը։ Այն նախատեսում է ուկրաինական հացահատիկի արտահանում Սև ծովով և վերացնում ռուսական պարարտանյութերի ու սննդամթերքի մատակարարման խոչընդոտները։ Հացահատիկի գործարքն ավարտվել է այսօր՝ հուլիսի 18-ին, ռուսական կողմի չկատարված պահանջների պատճառով։ Այս ֆոնին ցորենի գները բարձրացել են։ Ուկրաինայի նախագահ Վոլոդիմիր Զելենսկին առաջարկել է շարունակել հացահատիկի գործարքի իրականացումը առանց Ռուսաստանի Դաշնության մասնակցության։