Արցախում տեղի ունեցող նստացույցն ընդամենը իշխանությունների կողմից կազմակերպված PR ակցիա է․ քաղտեխնոլոգ

Ինչպես հայտնի է՝ այս օրերին ԱՀ-ում տեղի է ունենում համաժողովրդական անժամկետ շարժում և ի աջակցություն Արցախի՝ Հայաստանում ևս տեղի են ունենում ակցիաներ՝ տարբեր դեսպանատների դիմաց։ Մինչ հասարակությունը ոտքի է կանգնել հանուն Արցախի փրկության, ՀՀ վարչապետը այս ֆոնին այսօր այցել է «Մասիսի խելացի անասնագոմ»։

ԼՈՒՐԵՐ.com-ի հետ զրույցում քաղտեխնոլոգ Արմեն Բադալյանը նշեց, որ Արցախում տեղի ունեցող նստացույցն  ընդամենը իշխանությունների, այդ թվում՝ նաև Հայաստանի իշխանությունների կողմից կազմակերպված PR ակցիա է, որը նպատակ չունի բարելավելու արցախցիների կարգավիճակը կամ բացելու Լաչինի միջանցքը,  իսկ ինչ վերաբերում է վարչապետի՝ անասնագոմ գնալուն և այս գործընթացին մասնակից չլինելուն՝ բնական է, որովհետև Հայաստանի իշխող քաղաքական թիմը բերվել է 2018 թվականին նրա համար, որպեսզի իրենք Արցախը հանձնեն Ադրբեջանին ամբողջովին՝ առանց որևիցե կարգավիճակի, և այնտեղից դուրս բերեն  խաղաղապահ զորքերը։

«Եթե Արցախի բնակչությունը իրականում ցանկանում է իր վիճակը բարելավել, ապա պետք է ոչ թե ուրախանա կամ տխրի, որ Արցախի նախագահը նստացույց է իրականացնում, այլ կազմի պատվիրակություն և ուղարկի Արցախի նախագահի մոտ՝ պահանջելով նրա հրաժարականը, հրաժարական չտալու դեպքում էլ ստիպի Արցախի նախագահին հեռանալ զբաղեցրած պաշտոնից, որից հետո ընտրի իր համար ցանկալի թեկնածուին, ով ցանկություն ունի իրականում պայքարել և ոչ թե թատերական գործողություններ իրականացնել»,-ասաց Բադալյանը։

 Զրուցակցի խոսքով` Արցախում բոլոր քայլերը որևէ տեղ չտանող քաղաքականություն է, այդ տեխնալոգիաներն իրենց չեն արդարացնելու, որովհետև դրանք իրականացվում են քաղաքական այն ուժի կողմից,  որը մեղսակից է Արցախում ստեղծված իրավիճակի մեջ։ 

 «Նիկոլ Փաշինյանը երբեք ժողովրդին մոտ չի եղել ու չի էլ լինելու, Հայաստանում ժողովուրդը չէ, որ իշխանափոխություն է իրականացնելու, ժողովուրդն այլևս այդ ուժը չունի և երբեք էլ չի ունեցել։ Հայաստանում իշխանափոխություն կարող է լինել միայն արտաքին քաղաքական կենտրոններից կամ Ռուսաստանի և Արևմուտքի կողմից»,– նշեց մեր զրուցակիցը։ 

Լիլիթ Զալիբեկյան