Ղրիմում զինամթերքի պահեստում հրդեհ է բռնկվել. Ուկրաինան ստանձնել է պատասխանատվությունը

Ղրիմում զինամթերքի պահեստում բռնկված հրդեհի վայրից հինգ կիլոմետր շառավղով պայթյուններ են լսվել: Այս մասին հայտնի է դարձել Mash Telegram ալիքին։

Ալիքի տվյալներով՝ հրդեհված պահեստը գտնվում է Ալեքսեևկա գյուղի մոտ։ Ոչ ոք չի տուժել։

Ուկրաինան ստանձնել է պայթյունի պատասխանատվությունը։ Այս մասին Telegram-ում հայտնել է Ուկրաինայի պաշտպանության նախարարության գլխավոր հետախուզական վարչության պետ Կիրիլ Բուդանովը՝ հրապարակելով այրվող պահեստի տեսագրությունը։

«Օկուպացված Ղրիմում հաջող գործողություն է իրականացվել, հակառակորդը թաքցնում է վնասի չափն ու կենդանի ուժի կորուստների քանակը»,- գրել է Բուդանովը։

Ավելի վաղ Ղրիմի ղեկավար Սերգեյ Ակսյոնովը հայտնել էր, որ Կիրովսկի շրջանի պոլիգոնում բռնկված հրդեհի պատճառով արգելափակվել է Տավրիդայի մայրուղին։ Իր հերթին Ղրիմի ղեկավարի խորհրդական Օլեգ Կրյուչկովը պարզաբանել է, որ 118-ից 130-րդ կիլոմետրից երթուղու մի մասը արգելափակվել է։ Այժմ տրանսպորտի անցումն իրականացվում է Ստարի Կրիմ և Պերվոմայսկոյե բնակավայրերով։

Տեսանյութը՝ այստեղ։