Ռուսաստանը ՄԱԿ-ին 90 օր ժամանակ է տվել

ՄԱԿ-ը 90 օր ունի՝ շարունակելու աշխատանքը ռուսական գյուղատնտեսական ապրանքների արտահանման խոչընդոտները վերացնելու ուղղությամբ հացահատիկի համաձայնագրի շրջանակներում, որն ավարտվել է հուլիսի 18-ին: Այս մասին հայտարարել է ՌԴ ԱԳՆ-ն՝ հղում կատարելով այս թեմայով Ռուսաստան-ՄԱԿ հուշագրի դրույթներին։ Այն, որ միջազգային կազմակերպությունը հուշագիրը կյանքի կոչելու համար ունի ևս երեք ամիս, ասել է ԱԳՆ պաշտոնական ներկայացուցիչ Մարիա Զախարովան, գրում է Kommersant-ը։

«Հուշագրի 6-րդ կետի համաձայն՝ համաձայնագիրը ուժի մեջ է լինելու երեք տարի, և եթե կողմերից մեկը (Ռուսաստանը կամ ՄԱԿ-ը) մտադիր են դադարեցնել դրա կիրառումը, ապա պետք է ծանուցեն երեք ամիս առաջ։ Այսպիսով, ՄԱԿ-ի քարտուղարությունը դեռ 90 օր ունի՝ շարունակելու աշխատանքը ռուսական գյուղատնտեսական ապրանքների արտահանման նորմալացման ուղղությամբ»,- ասվում է մամուլի հաղորդագրությունում։

Ռուսաստանի և Ուկրաինայի միջև հացահատիկի գործարքը ենթադրում է ուկրաինական հացահատիկի արտահանում Սև ծովով և վերացնում ռուսական պարարտանյութերի և սննդամթերքի մատակարարման խոչընդոտները: Ռուսաստանը չի երկարաձգել գործարքը՝ իր պայմանները չկատարելու պատճառով։ Ուկրաինան ՄԱԿ-ի երկրներին կոչ է արել Ռուսաստանից պահանջել վերսկսել գործարքը։ Եվրամիությունը նույնպես կոչ է արել վերադառնալ դրան։