Չինաստանում պաշտոնյան մահապատժի է դատապարտվել կաշառք վերցնելու համար

Չինաստանում դատարանը կաշառք ստանալու համար պայմանական մահապատժի է դատապարտել Հանչժոուի էլեկտրոնային առևտրի կենտրոնի կոմունիստական ​​կուսակցության նախկին ղեկավար Չժոու Ցզյանգյոնին։ Կաշառքի ընդհանուր գումարը կազմել է մոտ 25 մլն դոլար, գրում է Bloomberg-ը։

Հետաքննությանը հաջողվել է ապացուցել պաշտոնյայի մասնակցությունը կոռուպցիոն սխեմաներին։ Չինական լրատվամիջոցների փոխանցմամբ՝ նա գումար է ստացել ընկերություններից ու անհատներից, իսկ դրա դիմաց հողային հարցեր է լուծել ու օգնել շինարարական նախագծերի իրականացմանը։

Նա նման պայմանագրեր է կնքել 2001 թվականից։ Հնարավոր է, որ քաղաքական գործչի մահապատիժը երկու տարի փորձաշրջանից հետո փոխարինվի ցմահ ազատազրկմամբ։ Բացի այդ՝ Չժոու Ցզյանգյոնը կզրկվի քաղաքական գործչի իրավունքներից, իսկ նրա ունեցվածքն ամբողջությամբ կբռնագրավվի։