Մոսկվան բաց է Ուկրաինայի հետ խաղաղության շուրջ բանակցությունների համար. Պեսկով

Ռուսաստանի նախագահի մամուլի խոսնակ Դմիտրի Պեսկովը հայտարարել է, որ Մոսկվան պատրաստ է խաղաղ բանակցությունների՝ Ուկրաինայում իրավիճակի կարգավորման համար, սակայն դրան խանգարում է Կիևի «անհաշտ դիրքորոշումը»։

«Ռուսական կողմը շարունակում է բաց լինել, ինչը չի կարելի ասել ուկրաինացիների մասին։ Ուկրաինացիները պահպանում են իրենց անզիջում դիրքորոշումը հատկապես հիմա, երբ նրանք գտնվում են ծանր իրավիճակում, բայց, այնուամենայնիվ, նրանք դեռ մերժում են երկխոսության ցանկացած հնարավորություն»,- ասել է Պեսկովը Սանկտ Պետերբուրգում Ռուսաստան-Աֆրիկա ֆորումի շրջանակներում, մեջբերում է Interfax-ը:

Նրա խոսքով՝ Ռուսաստանը հարգում է տարբեր պետությունների միջնորդական ջանքերը՝ ուկրաինական հակամարտությունը լուծելու համար։ Նա կարծում է, որ տվյալ դեպքում Ուկրաինայի իշխանությունների դիրքորոշումը, որոնք արգելք են դրել Ռուսաստանի Դաշնության հետ օրենսդրական մակարդակով ուղիղ բանակցությունների համար, «անկեղծ ասած՝ ոչ կառուցողական է»։

Հուլիսի 6-ին Բելառուսի նախագահ Ալեքսանդր Լուկաշենկոն հայտարարեց, որ Ուկրաինայում իրավիճակի կարգավորման շուրջ խաղաղ բանակցությունները կարող են սկսվել սեպտեմբերից մի փոքր ուշ։ Միևնույն ժամանակ, Ուկրաինայի նախագահ Վոլոդիմիր Զելենսկին բազմիցս նշել է, որ հակամարտությունը կարող է ավարտված համարվել միայն այն դեպքում, եթե Ղրիմը վերադարձվի Ուկրաինային։ Նրա խոսքով՝ Ուկրաինայի զինված ուժերը ձգտում են վերադարձնել հարավում և արևելքում կորցրած բոլոր տարածքները։