ՌԴ ԱԳՆ-ն հայտնել է՝ երբ դուրս կբերի իր միջուկային զենքը Բելառուսից

Ռուսական մարտավարական միջուկային զենքի դուրսբերումը Բելառուսի տարածքից հնարավոր է միայն այն դեպքում, եթե ԱՄՆ-ն և ՆԱՏՕ-ն հրաժարվեն Ռուսաստանին նպատակաուղղված խարխլելու կործանարար կուրսից։ Այս մասին հայտարարել է ՌԴ ԱԳՆ ԱՊՀ երկրների երկրորդ վարչության տնօրեն Ալեքսեյ Պոլիշչուկը։ Նա միջուկային զենքի տեղակայումն անվանել է պատասխան «ՆԱՏՕ-ի և Վաշինգտոնի ապակայունացնող միջուկային քաղաքականությանը», գրում է Kommersant-ը։

«Այս առումով, ռուսական մարտավարական միջուկային զենքի հիպոթետիկ դուրսբերումը Բելառուսի տարածքից հնարավոր կլինի միայն այն դեպքում, եթե ԱՄՆ-ն և ՆԱՏՕ-ն հրաժարվեն Ռուսաստանի և Բելառուսի անվտանգությունը նպատակաուղղված խաթարելու իրենց կործանարար կուրսից։ Դա ենթադրում է ամերիկյան ամբողջ միջուկային զենքի ամբողջական դուրսբերում ԱՄՆ տարածք՝ Եվրոպայում համապատասխան ենթակառուցվածքի վերացումով»,- ասել է պարոն Պոլիշչուկը։

Ռուսաստանի նախագահ Վլադիմիր Պուտինը Բելառուսում մարտավարական միջուկային զենք տեղակայելու որոշման մասին հայտարարել է մարտի 25-ին։ Այն կտեղափոխվի միութենական պետության արևմտյան սահմաններ։ Ըստ պայմանագրի՝ միջուկային զենք կիրառելու որոշումը մնում է ռուսական կողմին։ Հուլիսի 7-8-ը պետք է ավարտվեր զենքի տեղակայման օբյեկտների նախապատրաստումը։ ՆԱՏՕ-ն և ԱՄՆ-ն դատապարտել են Ռուսաստանի իշխանությունների որոշումը։